Саха сиринээҕи ураты суолталаах дьыалалары силиэстийэлиир иккис отдела хомуйбут матырыйаалларынан, Анаабыр улууһун урукку баһылыгар буруйдуур бириигэбэрэ таҕыста. Кини РФ Холуобунай Кодексатын 6 ч. 290 ыст. буруйдааҕынан ааҕылынна, суруйда Саха сирэ саайт.
Силиэстийэ уонна суут быһаарыытынан, буруйданааччы эр киһи 2019 сыл алтынньы ыйыттан 2022 сыл тохсунньутугар диэри кэммиэрчэскэй тэрилтэ генеральнай дириэктэриттэн 4,1 мөл. солк. тахса суума харчынан бэрик ылбыта быһаарылынна. Бэрик харчы Сааскылаах нэһилиэгэр хочуолунай тутуутугар туһааннаах коммерческай тэрилтэ туһатыгар конкуренцияны хааччахтыырга уонна дуогабардары түһэрсиигэ туһуламмыт.
Суут бириигэбэринэн, Анаабыр улууһун урукку баһылыга 14 сылга диэри кытаанах эрэсиимнээх холуонньаҕа көҥүлэ быһылынна, ону сэргэ судаарыстыбаннай сулууспаҕа уонна олохтоох салайыныы уорганнарыгар, тэрийэр-дьаһайар, административнай-хаһаайыстыбаннай тэрилтэлэргэ үлэлиир быраабын 14 сылга болдьоххо быстылар диэн ИДьМ Саха сиринээҕи силиэстийэлиир кэмитиэтин пресс-сулууспата иһитиннэрдэ.
