17 Балаҕан ыйа 17.09
  • 19°
  • $ 73,19
  • 86,89

Аммалар тастан от атыылаһар былааннара суох

Амма улууһугар эбии аһылыгы бэлэмнээһин былаана туолла, от хаачыстыбата үчүгэй. Ол туһунан тыа хаһаайыстыбатын управлениетын кылаабынай агронома Николай Гаврильев «Амма олоҕо» хаһыакка кэпсээтэ. 

“Быйыл оттооһуҥҥа да, бурдук да хомууругар бэртээхэй күн-дьыл турар буолан, звенолар сүрүннээн оттоон бүтэн эрэллэр. Улуус үрдүнэн 26 мобильнай звено баарыттан, билигин 7 звено хаалан оттуу сылдьар. Кинилэр былааннара 4035 тонна эбит буоллаҕына, күн бүгүн 3451 тоннаны оттоон, былаан 85,3 бырыһыан туолан турар. Звенолар Олом Күөлгэ, Нуотара, Хотуйа үрэх баһыгар, Амма Наахараҕа оттоотулар. Быйыл от хаачыстыбата үчүгэй диэн этиэххэ наада. Тастан от атыылаһар былааҥҥа суох. Тиийбэт оппутун улуус иһиттэн булунар санаалаахпыт. Былырыын хаһыы суох буолан, сылгылар элбэх оту сиэбиттэрэ. Быйыл көрөргүт курдук от кэнчээрилээтэ. Онон хаһыы баар буолуо, онон сылгылаахтар ордор отторун атыылыахтара дии саныыбыт. Маны сэргэ эбии аһылык үүнүүтэ үчүгэй. Ол курдук сенажка былаан 119 бырыһыан туолла, өссө да үрдүүрэ буолуо. Онтон сиилэс былаана 104,5 бырыһыан туолла. Билигин сүрүн кыһалҕа бурдук тааралааһыныгар баар. Үүнүү үчүгэй. Аны хомуллубут үүнүүнү сөптөөхтүк харайар сорук турар. Тэрилтэлэр субуотунньукка тахсаллар”, — диэн Николай Гаврильев билиһиннэрдэ.

Урукку өртүгэр тыа хаһаайыстыбатын үөрэҕин тэрилтэлэрин устудьуоннара бурдук хомууругар практикаларын ааһар эбит буоллахтарына, билигин ол суох. Кылаабынай агроном бэлиэтээбитинэн, кинилэр улахан харчыга эрэ кэлэллэр. Ону, биллэн турар, хаһаайыстыба уйунар кыаҕа суох. Дьиҥинэн, урукку үгэһи сөргүтэн, устудьуоннар саатар икки нэдиэлэ устата практикаларын баралларын олохтуохха баара.

17 сентября 17.09
  • 19°
  • $ 73,19
  • 86,89