«Алмаасэргиэнбаан» АКБ үп-харчы эргиирин ырыынагар бигэ туруктаах тэрилтэнэн буолар. Сахабыт сирин биир улахан баанын үлэтэ-хамнаһа дойдуга үп-харчы эйгэтин хонтуруоллуур тэрилтэ хараҕын далын иһигэр сылдьар. РФ бааннарын ситимин туһунан кырдьыкка олоҕурбут дьиҥнээх иһитиннэрии Арассыыйа Киин Баанын сайтыгар http://www.cbr.ru, уонна уурдарыыны страховкалыыр Ааҕыныстыба сайтыгар – http://www.asv.org.ru тахсар.
Өрөспүүбүлүкэ үбү-харчыны, кирэдьиити кытта үлэлиир биир сүрүн тэрилтэтигэр сымыйа сураҕынан саба түһүү, холуннарыы тахсыбыта нэһилиэнньэ ортотугар аймалҕаны үөскэтиэн сөп. Итиннэ олоҕуран, «Алмаасэргиэнбаан» АКБ АУо салалтата ФСБ (Куттала суох буолуу федеральнай сулууспатыгар) уонна ИДьМ (РФ Ис дьыалаҕа министиэристибэтигэр) сымыйа сураҕы тарҕатааччыны ирдэһэн буларга, кини быһыытын-майгытын сокуон хараҕынан сыаналыырга уонна буруйдааҕы эппиэккэ тардарга көрдөһүү сурук ыытарга күһэлиннэ.
ЫСПЫРААПКА:
«Алмаасэргиэнбаан» АКБ АУо 1993 с. ахсынньыга тэриллибитэ. Сүрүн акционер — СӨ Баайы-дуолу бас билии сыһыаннаһыыларыгар министиэристибэ (СӨ Бырабыыталыстыбата).
Баан өрөспүүбүлүкэ иһигэр 16 эбии офистаах, Дьокуускайга — 7, Москва, Владивосток куораттарга бэрэстэбиитэлистибэлэрдээх уонна Хабаровскайга үбү-харчыны кытта үлэлиир офистаах.
«Алмаасэргиэнбаан» 10 тыһ. тахса корпоративнай уонна 300 тыһ. чааһынай килийиэннэри хааччыйар. СӨ баан өҥөтүн ырыынагар «Алмаасэргиэнбаан» инники кирбиигэ сылдьар биир улахан универсальнай баан быһыытынан биллэр.
Биһ. корр.,edersaas.ru
