Нерюнгри оройуонуттан Саха сирин судаарыстыбаннай Мунньаҕын (Ил Түмэн) народнай депутата Александр Кошуков регион соҕуруу өттүгэр уматыгынан хааччыйыы балаһыанньатын быһаарда. Кини бэлиэтээбитинэн, бүгүн федеральнай таһымҥа от ыйыгар уонна атырдьах ыйыгар тиэйии кыраапыктара бигэргэтилиннилэр.
«Нерюнгри оройуонун олохтоохторо техниканы сапараапкалыыр ыстаансыйаларга бензини атыылааһын хааччахтаммытынан, дьиксинэллэрин биллэрэллэр. Наадалаах дьаһаллар бары кэмигэр ылыллаллар. Улахан суолталаах дуогабардар федеральнай таһымҥа хайыы-үйэ ситиһилиннилэр: Саха сирин баһылыга Айсен Николаев РФ вице-премьерэ Александр Новагы кытта көрүстэ. Кини сорудаҕынан биһиги өрөспүүбүлүкэбитигэр эбии хааччыйыы кээмэйэ быһаарылынна. От ыйыгар уонна атырдьах ыйыгар уматыгы тиэйии чуолкай кыраапыктара бигэргэтилиннилэр. Дизель уматыгын быһаччы тиэрдии туһунан дуогабардар ситиһилиннилэр. Ону тэҥэ авиационнай уматыгы аҕалыыны толору хаалларар кыахтанныбыт. Өрөспүүбүлүкэҕэ ниэп бородуукталарын сыаналарын уонна саппаастарын кэтээн көрүү күн аайы ыытыллар», – диэн Александр Кошуков бэлиэтээтэ.
От ыйын 15 күнүгэр биэдэмистибэлэр икки ардыларынааҕы хамыыһыйа мунньаҕар Саха сирин бырабыыталыстыбатын бэрэссэдээтэлэ Кирилл Бычков бырабыыталыстыба бэрэссэдээтэлин бастакы солбуйааччы Дмитрий Садовниковка сорудах биэрдэ. Маны таһынан гражданскай оборона дьыалаларыгар уонна нэһилиэнньэ олоҕун куттала суох буолуутун хааччыйыыга министиэристибэҕэ «Саханефтегазсбыт» АУо-ны кытта үс күн устата соҕуруу Саха сирин оройуоннарыгар уматыгы аҕалыыны улаатыннарыы источниктарынан боппуруоһу быһаарарга сорудахтанна.
«Быстах хааччахтааһын аһаҕас ирдэбили тохтоторго уонна уматык биир тэҥник тарҕанарын хааччыйарга наада. Инники күөҥҥэ хааччыйыыны билигин олох-дьаһах хааччыйыытын сулууспалара, быыһыыр тэриллиилэр уонна тыа хаһаайыстыбатын табаары оҥорооччулара ылаллар», — диэтэ Александр Кошуков.
