Алдан, коронавирус баара бигэргэммитинэн, өрөспүүбүлүкэ баһылыгын ыйааҕынан харантыыҥҥа сабылынна. Куоракка биэс ИВЛ аппараата тириэрдилиннэ. Бу туһунан вице-премьер Ольга Балабкина эттэ.
Алдаҥҥа коронавируһунан ыалдьыбыттар бааллара бигэргэннэ. Ол иһин куорат харантыыҥҥа сабылынна. «Самоизоляция» эрэһииминэн ылыллыбыт миэрэлэр барыта тутуһуллаллара булгуччулаах. Киирии-тахсыы медицина үлэһиттэригэр уонна бэрээдэги араҥаччылыыр уоргаттар сотрудниктарыгар эрэ көҥүл. Олоҕу-дьаһаҕы хааччыйар сулууспалартан ураты атын тэрилтэлэр үлэлэрэ тохтоото.
«Килиэби оҥорор собуоттар быыстала суох үлэлииллэр. Итиини-уоту биэрэр тэрилтэлэр бэйэлэрин эрэһиимнэрин тохтоппоттор. Суукканы эргиччи оҕону көрөр дьыссаат үлэлиир«, — диэтэ Ольга Балабкина.
Ханнык маҕаһыыннар уонна аптекалар үлэлииллэр быһаарыллар.
Ыарыһахтар Алданнааҕы инфекционнай балыыһаҕа сыталлар, эмтэниини ааһаллар. Биэс ИВЛ аппараата эбии тириэрдилиннэ. 200 миэстэлээх обсерватор бэлэм.
«Ыарыы тарҕаныыта ырыынагы кытта сибээстээх. Ол иһин контактаспыт дьон ахсаана элбэх. Долгуйбакка, дьиэҕитигэр буола сатааҥ диэн көрдөһөбүн«, — диэтэ Балабкина Алдан олохтоохторугар туһаайан.
