СӨ бырабыыталыстыбатын бэрэссэдээтэлин солбуйааччыта Алексей Дьячковскай кулун тутар 17 күнүгэр Алдаҥҥа кэлэн мунньахтаан барда. Урукку өттүгэр олохтоох каадыры үлэнэн хааччыйыыга Сөбүлэҥ түһэрсиитигэр бырабыыталыстыба өттүттэн кэлэн кыттыбыттарын өйдөөбөппүн.
Мунньахха «Стимулирование мобильности граждан» өрөспүүбүлүкэтээҕи бырагыраамма тула кэпсэттилэр. Каадырынан хааччыллыыга улахан хампаанньалар санаалара, толкуйдара төһө да араастаһыылаах буоллар, оройуон дьаһалтатын, дьарыктаах буолуу киинин кытта сыһыаннара уларыйбат.
Экономическай кириисис буолбутунан сибээстээн, олохтоох нэһилиэнньэ үлэнэн хааччыллыыта сытыытык турар. Нэһилиэнньэ саҥа усулуобуйаҕа үлэлииргэ билигин да бытаан, ол да буоллар идэлэригэр ирдэбил үрдээбитин билэн эрэллэр. Киэҥ, үрдүк таһымнаах бэлэми барбыт, идэлэрин толору баһылаабыт олохтоох эдэр дьон үлэлээх буолалларыгар киэҥ кэпсэтии таҕыста.
СӨ дьарыктаах буолууга департамена уонна «Алданзолото ГРК» АУо, «Золото Селигдара» ААУо олохтоох нэһилиэнньэни үлэнэн хааччыйыыга Сөбүлэһиигэ илии баттаһыыларынан мунньах түмүктэннэ.
Бу тэрээһиҥҥэ СӨ үлэҕэ уонна социальнай харалтаҕа миниистирин бастакы солбуйааччыта Степан Москвитин, СӨ үлэнэн хааччыйыы Департаменын салайааччытын солбуйааччыта Гаврил Харлампьев, Профессиональнай үөрэхтээһин миниистиэристибэтин үөрэҕи бүтэрээччилэри үлэнэн хааччыйыы Департаменын салайааччыта Алексей Павлов уо.д.а. кыттыыны ыллылар.
