19 Кулун тутар 19.03
  • -17°
  • $ 91,98
  • 100,24

Алампа аатынан 2022 сыллааҕы бириэмийэни тоҕус киһиэхэ туттардылар

10:31, 15 ноября 2022
Текст:
Читайте нас на
Яндекс Новости
ЯДВ

Быйыл Саха АССР өрөгөйдөөх 100 сыллаах үбүлүөйүгэр саха литературатын төрүттэспит классик суруйааччы, тылбаасчыт, биллэр общественнай-култуурунай деятель, бөлүһүөк Анемподист Иванович Софронов – Алампа  аатынан общественнай бириэмийэни туттарыы Өксөкүлээх Өлөксөй аатынан култуура киинигэр буолла.

Сахалыы лоп бааччы тыллаах-өстөөх ыытааччыларынан суруйааччы, суруналыыс, уйулҕаһыт Яна Байгожаева, СӨ үтүөлээх артыыһа, Былатыан Ойуунускай аатынан Судаарыстыбаннай бириэмийэ лауреата Айаал Аммосов буоллулар.

Бу тэрээһин сылтан сыл бэйэтин хайысхатын сонун тыыннаан иһэрин дьон бэлиэтээн кэпсээтэ.

Быйыл Былатыан Ойуунускай аатынан академическай тыйаатыр режиссера Руслан Тараховскай Алампа айымньыларыгар  тыыннаах дорҕоон доҕуһуоллаах музыка айан бар дьонугар сүрэхтээтэ. Саха народнай поэта Наталья Харлампьева салайар Саха Сирин суруйааччыларын Сойууһун сыралаах үлэтинэн тахсыбыт Анемподист Иванович Софронов-Алампа 32 тылынан тылбаастаммыт “Ыллыым ээ, ыллыым” кинигэтин сүрэхтэниитэ Саха тыйаатырын Алампа аатынан саалатыгар өрө көтөҕүллүүлээх быһыыга-майгыга буолан ааспытын иһитиннэрдилэр.

Алампа общественнай бириэмийэ статуэткатын үгэс курдук Николай Чоччасов чочуйан оҥорор. Сылын ахсын 9 анал ааттар ааттанар. Ол курдук Дьүүллүүр сүбэ быһаарыытынан бириэмийэ туттарылынна.

1. Дархан ойууһут (Художник года) — Арассыыйа худуоһунньуктарын Сойууһун чилиэнэ, СӨ култууратын туйгуна Иннокентий Корякин
2. Бастыҥ ырыа айааччы (Автор-песенник) — СӨ норуодунай уонна үтүөлээх артыыһа, СӨ ырыанньык ааптардарын Сойууһун бэрэссэдээтэлэ Алексей Васильевич Егоров.
3. Идэтигэр сүдү бэриниилээх – СӨ култууратын үтүөлээх үлэһитэ, СӨ үөрэҕириитин бочуоттаах бэтэрээнэ, «Гражданскай килбиэн» бэлиэ хаһаайына Мария Николаевна Боппоенова.
4. Киинэ эйгэтин чыпчаал үлэһитэ (Кинематографист) — А.Е.Кулаковскай-Өксөкүлээх аатынан Судаарыстыбаннай бириэмийэ лауреата, Азия уонна Чуумпу акыйаан киноакадемиятын чилиэнэ режиссер, сценарист, продюсер Любовь Борисова.
5. Чаҕылхай артыыс (Лучший артист) — Арассыыйа култууратын үтүөлээх үлэһитэ, СӨ үтүөлээх уонна норуодунай артыыһа, Арассыыйа бырабыыталыстыбатын Волков аатынан бириэмийэтин лауреата, Гражданскай килбиэн бэлиэ хаһаайына, Үүнэр көлүөнэ тыйаатырын дириэктэрэ Алексей Павлов.
6. Чаҕылхай артыыска (Лучшая артистка) — 2022 сыллааҕы Алампа бириэмийэтин туттарарга Хотугулуу-Илиҥҥи федеральнай университет саха литературатын кафедратын сэбиэдиссэйэ, филологическай наука доктора, СӨ култууратын үтүөлээх үлэһитэ, Алампа бириэмийэтин лауреата, СӨ суруйааччыларын Сойууһун чилиэнэ Валентина Семенова тылы ылла. Кини Алампа тылларыгар ырыа ыллаан бар дьонун үөртэ. Чаҕылхай артыыска номинация кыайыылаҕынан Елена Маркованы ааттаата. Елена «Хаарыан хампа кытылым» уонна Ньурбатааҕы Сата театральнай бэстибээллэр иккилии төгүллээх кыайыылаахтара бу наҕараадатын долгуйан туран уһуйааччытыгар Матрена Корнилова аатыгар анаан илдьэ сылдьыам диэтэ.
7. Дэгиттэр режиссер – СӨ култууратын үтүөлээх үлэһитэ, Былатыан Ойуунускай аатынан Саха академическай тыйаатырын режиссера Руслан Тараховскай.
8. Алампаҕа сүдү бэриниилээх (За верность Алампа) — Таатта улууһун дьаһалтатын үлэһитэ Изабелла Александровна Сивцеваҕа, Арассыыйа үөрэхтээһинин бочуоттаах үлэһитэ, педагогическай наука хандьытаата, Алампа аатын үйэтитиигэ утумнаах үлэни ыытааччыга.
9. Өрөгөйдөөх өйөөччү – Арассыыйа худуоһунньуктарын Сойууһун чилиэнэ, СӨ култууратын туйгуна, «Гражданскай килбиэн» бэлиэ хаһаайына, Олоҥхо ыһыахтарын тутууларын салайбыт Вячеслав Яроев.

Дьоһуннаах тэрээһини иилээн-саҕалаан, тэрийбит АЛАМПА ААТ (айар аймах түмсүүтэ) бары кыттыылаахтарыгар (салайааччы М.В.Турантаева) көрөөччү быһыытынан улахан махталбын тиэрдэбин. Улуу дьоммут ааттара ааттана туруохтун. Култуура эйгэтин араас хайысхатыгар үлэлиир дьон бу курдук саҥаттан саҥа аакка тигистиннэр.

Дьоро киэһэни Саха тыйаатырын уонна Олоҥхо тыйаатырын артыыстара ылбаҕай ырыаларынан-тойуктарынан киэргэттилэр: Александр Борисов. Елена Маркова, Илья Стручков, Күннэй Николаева, Ильяна Павлова, Гаврил Менкяров, Мария Михалева, Настя Алексеева.

Ааптар: Марина Винокурова

Следите за самым важным и интересным в Telegram-канале и WhatsApp-группе ЯСИА