Ньурба улууһун ситэриилээх былааһын ааспыт сыллааҕы үлэтин отчуотун кэмигэр Аканаҕа 5 хостоох уопсай дьиэ аһыллыыта буолла. Нэһилиэк салалтата уруккута дьааһыла дьиэтин эдэр үлэһиттэргэ аналлаах уопсай дьиэ гынарга туруорсубута, улуус пресс-сулууспата суруйар.
Акана нэһилиэгин туруорсуутун Ньурба улууһун дьаһалтата өйөөн, улуустааҕы каадыр саппааһын бэлэмнииргэ тус сыаллаах бырагыраама чэрчитинэн 2 мөл. солк. көрүллүбүтэ. Дьиэни Ньурбатааҕы «СМУ» ХЭТ өрөмүөннээн, тохсунньу 25 күнүгэр үлэҕэ киллэрдэ.
Үөрүүлээх тэрээһиҥҥэ сахалыы сиэри-туому биллиилээх норуот эмчитэ уонна алгысчыта, Таркаайы нэһилиэгин бочуоттаах олохтооҕо Алиса Иннокентьевна силигин ситэрдэ. «СМУ» ХЭТ генеральнай дириэктэрэ Павел Потапов дьиэ символическай күлүүһүн нэһилиэк баһылыга Ефрем Семеновка туттарда.
Аалай лиэнтэ быһылынна. Эҕэрдэ истиҥ тылларын Ефрем Семенов уонна улуус баһылыга Алексей Иннокентьев эттилэр. Алексей Михайлович эдэр үлэһиттэргэ олохторугар табыллыылаах уонна ситиһиилээх буолалларыгар баҕарда, аныгыскы ыйга Хорулаҕа өрөспүүбүлүкэтээҕи Үтүө дьыала хамсааһынын чэрчитинэн 4 кыбартыыралаах уопсай дьиэни аһылларын иһиннэрдэ. Улууска эдэр дьон кэлэн үлэлииллэригэр уонна эдэр ыаллар үөскээһиннэригэр сөптөөх усулуобуйаны тэрийэргэ үлэ бу курдук салҕанан иһиэҕин бэлиэтээтэ.
Бу күн улуус баһылыгын илиититтэн Акана орто оскуолатын алын кылааһын учуутала Анна Семенова уонна история, обществознание учуутала Иван Петров хосторун күлүүһүн туттулар.
