Арассыыйа бэрэсидьиэнэ Владимир Путин Саха Өрөспүүбүлүкэтин баһылыгын кытта көрсүһүүтүн кэмигэр Айсен Николаев Өлүөнэ өрүһү туоруур муостаны тутуу бырайыагын олоххо киллэрии хаамыытын туһунан иһитиннэрдэ уонна тутуу тутаах фазаҕа киирбитин бэлиэтээтэ. Билигин муоста аҕыс тирэҕин мыбаайатын акылааттарын тутуу түмүктэннэ, 920 бырайыакка көрүллүбүт сыбаайаттан 208-һа ууга киллэрилиннэ. Быйыл Өлүөнэ өрүс төрдүгэр быһаччы сүрүн пилоннар акылааттарын тутууга киирэрэ былааннанар.
Тутуу биир тутаах түһүмэҕэ – тимир коффердамнары – кылгас тутуу сезонун усулуобуйатыгар өрүс төрдүгэр үлэни толорорго кыах биэрэр анал харыстыыр конструкциялары туруоруу саҕаланна. Үс коффердамтан биирдэрэ өрүс төрдүгэр таһаарыллан, быстах кэмҥэ турар сиргэ тиксибит. Иккис коффердам таһаарарга бэлэмнэнэр, үһүс коффердам истиэнэтин панелларын бөдөҥсүтэн хомуйуу оҥоһуллар.
Туттуллар технология Россия муостатын тутуутугар ураты буолар уонна тутуу болдьоҕун лаппа кыччатар кыаҕы биэрэр. Владимир Путин тутуу уопсай сыаната 170 млрд солк.тахса буоларын тоһоҕолоон бырайыак далааһынын бэлиэтээтэ.
Өлүөнэ муостатын тутууга хайыы-үйэ 26,2 млрд солк., федеральнай бюджет 4,9 млрд солк., өрөспүүбүлүкэ бюджетыттан 10,9 млрд солк. уонна бюджеттан таһынан источниктартан 10,4 млрд солк. киирдэ. Бырайыак бюджет үбүлээһинин сүрүн кээмэйэ 68,4 млрд солк. 2027-2028 сылларга бигэргэтилиннэ.
Российскай Федерация президенин өйөбүлүнэн Өлүөнэ муостатын тутуу бүгүн көхтөөх фазаҕа ыытыллар. Бырайыак Саха сиригэр эрэ буолбакка, Уһук Илиҥҥэ барытыгар стратегическай суолталаах. Ону олоххо киллэрии дойду бөдөҥ регионун сылы быһа транспортнай ситимин, аан дойдутааҕы транспортнай ситимин сайыннарыыны уонна өрөспүүбүлүкэ экономикатыгар уонна олохтоохторугар саҥа кыахтары тэрийиини хааччыйыаҕа.
