Уот ситимин тарыыптарын үрдэтии энергетикэ хайысхатыгар инвестициялары тардардыыга сүрүн ньыма быһыытынан туттуллуо суохтаах, тоҕо диэтэххэ, тарыыбы тохтоло суох үрдэтии экэниэмикэҕэ уонна бырамыысыланнаска куһаҕаннык дьайыаҕа. Бу туһунан ТАСС-ка Арассыыйа Федерациятын Судаарыстыбаннай Сэбиэтин «Энэргиэтикэ» хайысхатынан хамыыһыйатын бэрэссэдээтэлэ, Саха Өрөспүүбүлүкэтин баһылыга Айсен Николаев Петербургтааҕы норуоттар икки ардыларынааҕы экэниэмикэ пуорумугар (ПМЭФ) иһитиннэрдэ.
«Биһиги уот ситимин тарыыптарын тохтообокко үрдэтэрбит эмиэ табыллыбат. Арассыыйатааҕы энэргиэтикэҕэ инвестициялары киллэрии боппуруостарын аҥардас тарыыптары үрдэтиинэн быһаарар кыаллыбат. Ирдэнэр инвестициялар кээмэйдэрэ олус улахан», — диэн кини эттэ.
Кини бэлиэтээбитинэн, баар күүстэри саҥардыыга уонна саҥа генерация эбийиэктэрин тутууга ирдэнэр инвестициялар кээмэйдэрэ улахан буолан, судаарыстыба салааны үбүлүүр эбии мэхэньиисимнэри сайыннарыахтаах.
Николаев санаппытынан, Арассыыйа бырамыысыланнаһыгар уот төлөбүрүн сыаната күрэстэһэр кыах биир сүрүн факторынан буолар. «Ханнык баҕарар экэниэмикэҕэ, хас биирдии бырамыысыланнас салаатыгар энэргиэтикэ тарыыптара быһаарар оруоллаахтар», — диэн кини бэлиэтээтэ.
Эрдэ улахан бырамыысыланнай туһанааччылар уот ситимин бүтэһик сыанатын үрдэтиигэ тиэрдиэн сөптөөх ханнык баҕарар уларытыыларга мораторий киллэрэр туһунан этии киллэрбиттэр эрээри, Энэргиэтикэ министиэристибэтэ бу көҕүлээһини өйөөбөтө.
