Саха сирин баһылыга Айсен Николаев Мииринэй оройуонун үөрэх үлэһиттэрин балаҕан ыйынааҕы сүбэ мунньахтарыгар кытынна. Кини манна «оскуола – кэллиэс – үрдүк үөрэх – тэрилтэ» диэн биир ситим оҥоһуллубутун, оттон бэлэмнээһин хаачыстыбатын выпускниктар түмүктэрэ туоһулуурун бэлиэтээтэ: быйыл икки үөрэнээччи БКЭ-ҕэ 100 баалы ылбыт.
«Бары 10–11 кылаастарга хайысхалаах үөрэтии ыытыллар, АЛРОСА уонна «Роснефть» корпоративнай кылаастара үлэлииллэр, дуальнай үөрэхтээһин сайдар. М.К. Аммосов аатынан ХИФУ Мииринэйдээҕи политехническэй института уонна эрэгийиэннээҕи тиэхиньиичэскэй кэллиэс исписэлиистэри улууска бэлэмнииллэр», — диэн Саха сирин баһылыга «Макс-ка» суруйда.
Үөрэх таһымын учууталлар систиэмэлээх үлэлэрэ хааччыйар: методическай холбоһуктар, биридимиэттээх кафедралар, муниципальнай инновационнай былаһааккалар, кураторство института уонна оскуолалар ыккардыларынааҕы бииргэ үлэлээһин.
«Мииринэй оройуонун ситиһиилээх уопутун өрөспүүбүлүкэ бүттүүнүгэр тарҕатар наада, оччоҕо үөрэх үрдүк хаачыстыбата бөдөҥ куораттарга да, кыра нэһилиэнньэлээх пууннарга да хааччыллыаҕа», — диэн Айсен Николаев тоһоҕолоон эттэ.
Кини атырдьах ыйынааҕы Саха сирин үөрэх үлэһиттэрин сүбэ мунньаҕар бэриллибит сорудаҕы санатта — уопсай уонна идэлээх бэлэмнээһини, каадырдары үлэҕэ ылыыны уонна олохсутууну тиһиктээхтик кэтээн көрөр систиэмэни оҥорорго.
«Бу каадыр тиийбэтин учуоттааһынтан Саха сирин киһи хапытаалын харыстааһыҥҥа уонна сайыннарыыга каадырдары тиһиктээхтик салайыыга көһөргө кыаҕы биэриэҕэ. Мин Мииринэй улууһун үөрэҕин систиэмэтэ бу үлэҕэ көхтөөхтүк кыттыаҕа диэн эрэнэбин», — диэн өрөспүүбүлүкэ баһылыга иһитиннэрдэ.
