Саха Өрөспүүбүлүкэтин Ил Дархана Айсен Николаев, бүгүн, муус устар ый 29 күнүн бастакы аҥарыгар Бүлүү куоратыгар үлэлээтэ.
Мииринэй куораттан көтөн кэлбит Айсен Николаевы авиапорка улуус баһылыга Сергей Винокуров, улуус баһылыгын бастакы солбуйааччы Иван Евсеев, бырамыысаланнаска, инфраструктураҕа солбуйааччы Эдуард Эверстов, Бүлүү куорат баһылыга Ян Попов уо.д.а. көрүстүлэр.
Биллэрин курдук, Ил Дархан бэҕэһээ Мииринэй куоракка өрөспүүбүлүкэ сайдыытыгар улахан суолталаах АЛРОСА хампаанньа сыллааҕы үлэтин түмүгүн таһаарар, инники саҕахтарын быһаарсар мунньаҕын үлэтигэр кыттыбыта. Айсен Николаев Бүлүү куоратыгар, бастатан туран, өрүс кытылын үрдүгэр турар Кыайыы болуоссатыгар Бүлүү хотойдорун — Сэбиэскэй Сойуус Геройдара Николай Алексеевич Кондаков, Николай Саввич Степанов уонна Алексей Афанасьевич Миронов үйэлэргэ өлбөөдүйбэт сырдык өйдөбүллэрин, сурахтаах ааттарын кэриэстээн «Үс Герой» пааматынньыгар тыыннаах сибэкки уурда.
Салгыы Арассыыйаҕа бастыҥ бырайыагынан биллибит, былырыын күһүн арыллан, Бүлүү куорат киэргэлэ буолбут, дьон сөбүлээн тоҕуоруһар аныгы, тупсаҕай «Ыллыыр кумахтаах» кытылы көрдө, билистэ.
Өрөспүүбүлүкэ Баһылыга Айсен Николаев, Бырабыыталыстыба Бэрэссэдээтэлин бастакы солбуйааччы Дмитрий Садовников, доруобуйа харыстабылын миниистирэ Лена Афанасьева уо.д.а. Бүлүү куоратын балыыһатын комплексын иккис дьиэтин үөрүүлээх арыллыытыгар кытыннылар.
— Доруобуйа харыстабылын эйгэтигэр быйыл 4 улахан аныгы эбийиэги үлэҕэ киллэрэбит. Бүлүүгэ балыыһа комплексын иккис тупсаҕай дьиэтигэр мэдиссиинэ аныгы тэриллэрэ, ол иһигэр, МРТ аппарата туруорулунна. Саҥа дьиэ үлэҕэ киирбитинэн эҕэрдэлиибин! — диэн Айсен Николаев бэлиэтээтэ.
Улуус баһылыга Сергей Винокуров балыыһа иккис дьиэтэ үлэҕэ киирбитинэн Ил Дархан Айсен Николаевка, Госдуума депутаттарыгар Федот Тумусовка, Галина Данчиковаҕа, тутааччыларга уо.д.а. истиҥ махталын биллэрдэ.
Оройуоннааҕы балыыһа кылаабынай бырааһа, Ил Түмэн депутата Егор Григорьев Ил Дархан Айсен Николаевка Махтал суругу туттарда. Ил Дархан үс сыл анараа өттүгэр балыыһа комплексын бастакы дьиэтин арыллыытыгар эмиэ кыттыбыта. Айсен Николаев Бүлүү куоратыгар аныгы балыыһа комплекса үлэҕэ киирэригэр, Бүлүү бөлөх уонна Кэбээйи улуустарын олохтоохторо доруобуйаларын мэдиссиинэ аныгы үрдүк технологияларын көмөтүнэн чөлүгэр түһэрэллэригэр өҥөтө улахан.
Өрөспүүбүлүкэ Баһылыга улуус баһылыгын Сергей Винокуров, улуус, балыыһа салалталарын, улуус дьонун-сэргэтин туруорсууларын чугастык ылынан, өр кэмҥэ тутуута тохтоон турбут балыыһаны «Доруобуйа» национальнай барыл «Саха өрөспүүбүлүкэтин доруобуйа харыстабылын бастакы сүһүөх ситимин саҥардыы» бырагырааматыгар киллэртэрбитэ.
Үс сыллааҕыта балыыһа комплексын бастакы дьиэтэ үлэҕэ киирбитэ, бүгүн — иккис дьиэтэ арылынна.
Балыыһа комплексын саҥа арыллыбыт үс мэндиэмэннээх 4 тыһ кв м иэннээх дьиэтигэр терапия, акушер-гинекология, оҕону эмтиир, доруобуйаны чөлүгэр түһэрэр, сүрэх-тымыр, диагностика отделениелара үлэлиэхтэрэ, сэргэстэһэ турар 1600 кв м иэннээх дьиэҕэ реанимация куойкалаах хирургия, ыарыһахтары түүннэри-күнүстэри көрсөр отделениелар, рентген-кабинет, клиническай лаборатория, ас астыыр, таҥас сууйар блоктар үлэлииллэр.
Доруобуйаны чөлүгэр түһэрэр отделение улуустар ортолоругар Бүлүүгэ бастакынан арылынна.
П.А.Петров аатынан оройуоннааҕы балыыһа кылаабынай бырааһа, Ил Түмэн депутата Егор Григорьев Ил Дарханы үс мэндиэмэннээх саҥа балыыһа дьиэтигэр кэритэн сырытыннарда, балыыһа аныгы технологияларынан эмтииргэ Ил Дархан сорудаҕын толорууга ыытар үлэтин сиһилии билиһиннэрдэ.
Кини балыыһа комплексын бастакы дьиэтигэр үлэлиир хирургия отделениета мэдиссиинэ үрдүк технологияларын туһанан Бүлүү улууһун, ыаллыы сытар улуустар олохтохторугар лапароскопия, тыа сирин улуустарыгар бастакынан өттүк, тобук сүһүөхтэрин уларытыыга эпэрээссийэлэри саҕалаабытын, ыытарын кэпсээтэ.
Оройуоннааҕы балыыһа кылаабынай бырааһа Ил Дарханы балыыһа толору чинчийиини ыытар аныгы МРТ аппарата турар хоһугар сырытыннарда, үлэлиэхтээх эмчиттэр үөрэҕи ааспыттарын, үлэлииргэ бэлэмнэрин билиһиннэрдэ.
Балыыһа комплексын иккис дьиэтин тутуута саҕаланар үөрүүлээх тэрээһинигэр кыттарыгар Ил Дархан саҥа дьиэҕэ МРТ аппарата туруоруллуоҕун туһунан этиитэ туолла. Билигин ыаллыы сытар улуустар олохтоохторугар барыларыгар туһалыахтаах, босхо көмөнү оҥоруохтаах. Балыыһаҕа саҥа цифровой стационарнай оборудование туруорулунна.
Балыыһа комплексын икки дьиэтэ үлэҕэ киирэригэр Ил Түмэн депутата Егор Григорьев салайааччылаах оройуоннааҕы балыыһа салалта элбэх өрүттээх бэлэмнэнии үлэни ытта.
Балыыһа саҥа арыллыбыт дьиэтигэр И.М.Гоголев-Кындыл аатынан улуустааҕы бибилэтиэкэ ааҕар хоһун оҥоруу, палаталар аайы улуустааҕы «Олох суола» хаһыат дьааһыктарын туруоруу эмиэ сонун тэрээһин буолла.
«Бибилэтиэкэ дириэктэрэ, Бүлүү куорат Сэбиэтүн бэрэссэдээтэлэ Николай Харлампьев, «Олох суола» редакция кылаабынай редактора Изольда Загитова тэрилтэлэрин үлэлэрин билиһиннэрдилэр.
Айсен Николаев Саха сирин улуустарын ортолоругар саха тыллаах хаһыаттартан бастакынан тахсыбыт, соторутааҕыта тэриллибитэ 95 сылын бэлиэтээбит «Олох суола» хаһыат редакциятын суруналыыстарыгар биэрбит пресс-конференциятыгар өрөспүүбүлүкэ, Бүлүү улууһа социальнай-экономическай сайдыытын боппуруостарыгар хоруйдаата, санааларын, көрүүлэрин үллэһиннэ.
Салгыы Өрөспүүбүлүкэ Баһылыга салгыы М.Н.Жирков аатын култуура Дыбарыаһыгар «Биир ньыгыл Арассыыйа» баартыйа улуустааҕы салалтатын, кыттыллаахтарын кытта мунньаҕы салайан ыытыахтаах.
Мунньахха Госдума депутата Галина Данчикова, эдэр ыччат уонна социальнай алтыһыы миниистирэ Петр Шамаев, «Биир ньыгыл Арассыыйа» баартыйа Саха сиринээҕи отделениетын исполкомун салайааччы Надежда Селютина кытталлар.
Ааптра: Николай Куприянов, «Олох суола» хаһыат, Бүлүү.
