“Агростартап-2022” куонкурсугар кыттыыга докумуону ылыы кулун тутар 29 күнүгэр саҕаламмыта. Бэҕэһээҥи дааннайынан, 10-тан тахса киһи туттарбыт.
Тыа сиригэр агробизнеһи тэринэн, дохуот аахсыан, үлэ миэстэтин таһаарыан баҕалаахтар бу федеральнайдааҕы бырагыраамаҕа кыттыахтарын сөп.
Билигин агрокуонкуруска кыттыыга докумуону тутуу бара турар. Тыа хаһаайыстыбатын министиэристибэтэ иһитиннэрбитинэн, сайаапкалар киириилэрэ. Урукку сыллар холобурдарыгар көрдөххө, дьон үксүн бүтэһик нэдиэлэҕэ ыксыыр.
Кыттааччы бизнес-былаанын бырайыагын төһөнөн түргэнник туттарар да, ол киниэхэ ордук. Тоҕо диэтэххэ, баал тэҥнэһэр түбэлтэтигэр ким докумуонун бастакы туттарбыт – ол инники күөҥҥэ тахсар.
Докумуон тутуута муус устар 29 чыыһылатынан түмүктэнэр.
Грант уопсай суумата – 59 мөл солк. Бу, иннинээҕи сыллары кытта тэҥнээн көрдөххө, икки төгүл кыра.
Быйылгы куонкурус эрдэ буоларын туһунан, өссө 2021 сыл ахсынньытыгар тыа хаһаайыстыбатын министиэристибэтэ биллэрэн турар. Онон эрдэттэн бэлэмнэниҥ, бизнес-былааҥҥыт бырайыагын суруйа сылдьыҥ, сиргит-уоккут, хаһаайыстыбаҕыт докумуоннарын чөкөттүҥ диэн СИА «Куораттан дэриэбинэҕэ: Пиэрмэр» бырайыагар суруллубута. Ити эрээри “Куонкуруска докумуон тутуута саҕаланна. Министиэристибэ бирикээһэ таҕыста”, — диэн биллэриллибитигэр, “Бэлиэр дуо?”, — диэн ыйытааччылар, соһуйааччылар-өмүрээччилэр элбээбиттэрэ.
Докумуоннары министиэристибэҕэ Курашова 28 нүөмэрдээх дьиэтигэр, 212 кабинетыгар хамыыһыйа сэкирэтээрэ Гаврил Борохин тутар.
