Муҥурдаах балыыһатын үлэһиттэрэ үөһэттэн ыйыы-кэрдии күүппэккэ, үлэлиир сирдэрин бэйэлэрэ кэмигэр көрөн өрөмүөннэнэр-оҥостор идэлээхтэр.
Уһанар тэриллэрин тута сылдьан наадалаах миэбэллэрин бэйэлэрэ оҥостоллор. Ол курдук 20-чэ ыарыһах бииргэ олорон аһыыр остуолун, устууллары, ыскааптары, сибэкки, атах таҥаһа ууруллар полкаларын бэйэлэрэ оҥороллор, нэһилиэнньэҕэ кытта атыылыыллар. Оҕолор сытар хосторун истиэнэтин мультфильм геройдарынан ойуулаан киэргэппиттэр. Кырачааннар уруһуйдуулларыгар, аһыылларыгар анаан оҥорбут остуолларын, устуулларын эмиэ дьэрэкээн өҥүнэн кырааскалаан оһуордаабыттар.
Кыһын дьаарбаҥка тэрийэн ас арааһын астаан атыылыыллар. Ол атыылаабыт харчыларын эмиэ балыыһалара тупсарыгар тутталлар. Холобур, урут тэстэн эрэйдиир кырыыһаларын араас акция тэрийэн, көмө харчы эбии булунан 2014с. бэйэлэрэ уларыттан тураллар. Киирэрй аан үктэлин пандустаан, саҥаттан өрөмүөннээбиттэрэ. Кыһыннары-сайыннары дьиэлэрин ис -тас өттө сибэккинэн симэнэр кыраһыабай көстүүлээх. Нэһилиэнньэҕэ хаппыыста, помидор, перец рассаадатын олордон атыылаан эмиэ харчы киллэринэллэр.
Бу үлэни барытын профсоюз бэрэссэдээтэлэ Мотрена Сорокоумова салайар-көҕүлүүр. Быйылгы өрөмүөн үлэтин туһунан маннык кэпсиир: “Хас сыл аайы балыыһабытын кыра-кыра өрөмүөннэнэн кэмигэр саҥардабыт. Быйыл В. И. Новиков саахалланар туруктаах көрүдүөрбүт урут үрдүгэр кумахтаах буор кутуллубутун ыраастаан, ол оннугар ититэр тэлгэттэ. Ититэр матырыйаал ылыытыгар сиэстэрэ Т.Н. Иванова спонсордаан көмөлөстө. Ис өттүн фанеранан уларытан саайдыбыт. Остолобуойга уот ситимин А.К. Ефимов барытын саҥаттан тардан уларытта. Аны бу куннэргэ ититии систиэмэтэ сууйуллара хаалла».
Быйыл саас Акулина Никулина ыалдьан балыыһаҕа киирэн эмтэнэн тахсыбыта. Ол сытан “ханнык да кыччыыр түгэҥҥитигэр остолобуойгутун хайдах баарынан туруораарыҥ, саамай үчүгэй кэрэ миэстэҕитин өссө үчүгэйдик оҥостун” диэн 10 лиитэрэ кырааска, биир дьааһык ПФ үрүҥ, биир от күөҕэ өҥнөөх кырааска бэлэхтээбитэ. Онон үлэ быыһыгар остолобуойдарын үрдүттэн-анныгар дылы барытын саҥаттан кырааскалаатылар.
Чөл олоҕу пропагандалыыр сыаллаах үлэлиир тэрилтэ буолалларын быһыытынан, бу балыыһа үлэһиттэрэ 2010 с. улуус балыыһаларын иһинэн ыытыллар спорт араас көрүҥэр бастакы спартакиада тэрийбиттэрэ. Онтон ыла улуус араас нэһилиэктэригэр барытыгар ыытыллан баран, быйыл 6-с төгүлүн эмиэ Муҥурдаахха буолла. Бу оонньууну 6 төгүлүн ыытыллар Азия оҕолорун оонньууларыгар анаабыттара. Күрэхтэһиигэ 3-с төгүлүн кыайыы өрөгөйүн биллилэр.
Балыыһа иһигэр биир кыра хоһу эти-хааны эрчийэр араас тренажердары мунньан туруорбуттарыгар ыарыһахтар да, нэһилиэнньэ да киирэн дьарыктанар.
Кинилэр үлэлэрэ манан эрэ муҥурдаммат. Нэһилиэнньэҕэ ыытыллар бары тэрээһиннэргэ көхтөөхтөр. “Сайдам” диэн ааттаах ырыа ансаамбыла тэринэн сыанаттан түспэт артыыстар. Инникитин да былааннара киэҥ. Былыргы инструменнартан саҕалаан балыыһа юбилейыгар анаан таһаарбыт “Эмчиккэ махтал тыла сөҕүрээбэт” диэн кинигэлэрин, араас альбомнарын туруорар музей тэринэр баҕалаахтар.
