ОДьКХ Абыйдааҕы филиала Белай Гора бөһүөлэккэ уопсастыбаннай миэстэлэргэ субуотунньук тэрийдэ. Ол туһунан тэрилтэ телеграм-ханаалыгар суруйдулар.
Абый улууһугар ОДьКХ профсоюһун бэрэссэдээтэлэ Сардана Степанова уонна кытаанах бөҕү кытта үлэҕэ исписэлиис Анна Бережнова көҕүлээһиннэрин тэрилтэ атын сотрудниктара өйөөтүлэр.
Коммунальщиктар дьыссаат уонна бөһүөлэк киинин дьиэлэрин таһынан ыраастаатылар. Үлэ түмүгэр сэттэ куб бөҕү анал миэстэҕэ тиэйдилэр.
— Холобур буолабыт, олохтоохторго уонна тэрилтэлэргэ. Субуотунньугу бэйэ эрэ территориятыгар буолбакка, бөһүөлэккэ уопсай ыытар ордук. Тупсарыныыга төһөнөн элбэх киһи кыттар да, соччонон олорор сирбит тупсаҕай, ыраас буолар, — диэтэ Анна Бережнова.
