Саха сирин тирэх пуунун өрөмүөннүүр бөлөҕүн механиктара анал байыаннай дьайыы ыытыллар зонатыгар нэдиэлэ иһигэр биир «Якт-Сокол» квадроцикл бойобуой бэлэмин чөлүгэр түһэрдилэр. Исписэлиистэр өссө 13 анал байыаннай техниканы өрөмүөннээһиҥҥэ киирдилэр. Бу туһунан нэдиэлэ аайы ыытыллар брифиҥҥэ «Юстас» диэн ыҥырыылаах АБДь зонатыгар Саха сирин тирэх пууннарын кылаабынай сүрүннээччитэ иһитиннэрдэ.
“Тирэх пууннар үлэһиттэрэ нэдиэлэ иһигэр Саха сириттэн байыаннай сулууспалаахтарга гуманитарнай таһаҕаһы уонна 61 аадырыстаах баһыылканы аҕаллылар», — диэн спикер кэпсээтэ.
“Юстас” бэлиэтээбитинэн, тирэх пууннар боломуочуйалаах үлэһиттэрэ сураҕа суох сүппүт байыастары көрдүүллэрин салҕыыллар. Үлэ Россия Оборуонатын Министиэристибэтин Кылаабынай сүрүннүүр киинин бэрэстэбиитэллэрин кытта ыкса сибээстээхтик ыытыллар.
Санатан эттэххэ, анал байыаннай дьайыы байыастарын өйүүр үлэни “Бииргэ Кыайыыга!” диэн өрөспүүбүлүкэтээҕи хамыыһыйа сүрүннүүр, Саха сирин баһылыга Айсен Николаев салайар.
