Офтальмология өрөспүүбүлүкэтээҕи балыыһатын быраастара Өлөөн улууһуттан сылдьар 7 саастаах кыыс хараҕын көрөр оҥордулар. Балыыһаҕа эпэрээссийэҕэ анаан-минээн ускуустубаннай хрусталигы сакаастаатылар. Кыысчаан аҕата Александр Иванов кэпсээбитинэн, кыыс хараҕа ыалдьара өр кэмҥэ биллибэккэ сылдьыбыт. Быраастар биир сыл анараа өттүгэр мэдиссиинэ чинчийиитин кэмигэр төрүөҕүттэн катаракта баарын быһаарбыттар, суруйда Саха сирэ саайт.
“Кыысчааммыт Алиада катаракталааҕын былырыын уһуйааҥҥа эмчиттэри көрөр кэмнэригэр билбиппит. Биһигини тута эпэрээссийэҕэ ыҥырбыттара да, кыаллыбатаҕа. Биһиги дьиэ кэргэҥҥэ төрүөҕүттэн катаракта кимиэхэ да суоҕа, онон олус долгуйбуппут. Алиада хараҕа ыалдьарын туһунан хаһан да үҥсэргээбэт этэ. Ол гынан баран, билигин өйдөөтөхпүнэ, бастакы сибикилэр бааллар эбит. Кыысчааммыт ордук хаартыскаҕа түһэригэр харахтара симириктиирэ. Ону хаартыскаҕа түһэрин сөбүлээбэт дии саныырбыт”, — диэн Александр Иванов кэпсиир.
Катарактаҕа эпэрээссийэни үрдүк категориялаах быраас, Доруобуйа харыстабылын министиэристибэтин штаты таһынан офтальмолога Екатерина Захарова оҥордо. Маннык эпэрээссийэлэргэ ускуустубаннай хрусталиктары сакаастыыллар, быраастар ону ыарыһах хараҕын тус уратытынан көрөн талаллар. Билигин Алиада туруга үчүгэй, икки ыйынан хаҥас хараҕын эпэрээссийэлиэхтээхтэр.
Санатан эттэххэ, офтальмология Саха сиринээҕи балыыһатыгар катарактатын эпэрээссийэлэппит саамай кырачаан эмтэнээччинэн биир саастаах кырачааннар этилэр. 2024 сыллаахха игирэ уолаттары эмиэ Екатерина Захарова эпэрээссийэлээбитэ.
«Биһиги мэдиссиинэ үрдүк технологиялаах көмөтүн, ол иһигэр оҕолорго, салгыы сайыннарабыт. Саха сиригэр төрүөҕүттэн катарактаҕа эпэрээссийэни аан бастаан түөрт сыллааҕыта оҥорбуппут. Урут кырачааннар атын куоракка баран эпэрээссийэлэтэргэ күһэллэллэрэ, ол төрөппүттэрэ табыгаһа суоҕа. Төрүөҕүттэн катаракталаах кырачааннары эмтээһин – быраастарга уонна төрөппүттэргэ олус улахан үлэ. Хараҕы куруук көрө-истэ сылдьыахха, оҕолор анаммыт ачыкыларын кэтэллэрин кэтээн көрүөххэ наада. Биһиги балыыһабыт быраастара итинник ыарыылаах оҕолору эмтииргэ Гельмгольц институтугар анаан-минээн үөрэммиттэрэ”, — диэн офтальмология өрөспүүбүлүкэтээҕи килиниичэскэй балыыһатын кылаабынай бырааһа Иван Луцкан кэпсээтэ.
(Офтальмология балыыһатын пресс-сулууспатын матырыйаалынан)
