Аллараа Бэстээхтэн анал байыаннай дьайыы зонатыгар бэс ыйын 4 күнүгэр гуманитарнай көмө уочараттаах баартыйата ыытыллыаҕа. Таһаҕас састаабыгар — үс туонна кэриҥэ гуманитарнай көмө уонна аадырыстаах баһыылкалар, ону тэҥэ икки тиэхиньикэ баар.
Бу нэдиэлэҕэ территориальнай тирэх пууннарга байыаннайдар сайаапкаларынан утарылаһааччы БПЛА-ларын утары охсуһарга аналлаах «Птицеед» сеткомет уонна «Ворон» радиоэлектроннай охсуһуу комплекстара кэлэллэрэ күүтүллэр.
АБДь кыттыылаахтарын эбии хааччыйыы үлэтэ тиһигин быспакка ыытыллар. Өрөспүүбүлүкэтээҕи оперативнай штаб уорганнара, тэрилтэлэр уонна уопсастыбанньыктар кыттыыларынан байыаннайдар сайаапкаларынан тэриллэри, тиэхиньикэни уонна гуманитарнай таһаҕаһы салгыы тиэрдиини хааччыйар.
2026 сыл саҕаланыаҕыттан Саха сириттэн 30 гуманитарнай рейс оҥоһулунна. АБДь зонатыгар 79 тырааныспар тиэрдилиннэ, оттон көмө уонна аадырыстаах баһыылкалар уопсай кээмэйдэрэ 169 тоннаҕа тиийдэ.
