Тыа хаһаайыстыбатын министиэристибэтэ 25-тэн элбэх ыанар ынахтаах хаһаайыстыбаларга субсидия көрөр бырагырааматын 2023 сыллааҕы түмүгүн таһаарда. Боротокуолга ахсынньы 26 күнүгэр илии баттанна.
Бу бырагырааманы атыннык «финоздоровление» диэн ааттыыллар. Ол аата тыа хаһаайыстыбатынан дьарыктанар хаһаайыстыба ороскуотун толуйуу судаарыстыба өттүттэн көрүллэр. Холобур үлэһит хамнаһыгар, техника уматыгар, от-мас тиэйиитигэр-таһыытыгар, сапчаас иҥин курдукка көрүллэр харчы, диэтилэр министиэристибэҕэ.
Сайаапка түһэрээччи Фермер-3 диэн отчуотун сыл саҕаланыыта туттарар. Онон көрөн, анал хамыыһыйа быһаарар.
Быйыл 181 сайаапка киирбититтэн 176 хаһаайыстыба субсидия ыларын туоһулуур боротокуол таҕыста.
«Маннык бырагыраамалар баар буолан биһиги тыйыс айылҕалаах Сахабыт сиригэр хаһаайыстыба тэринэн, бородууксуйа оҥорон, бэйэ аһын аһыыбыт, тыа сиригэр үлэ миэстэтин таһаарабыт», — диир уонтан тахса сыл пиэрмэрдээбит Светлана.
