Саха сирин парламена эдэр ыалларга харчынан көмө туһунан сокуон барылын бастакы ааҕыыга ылынна, диэн өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.
Саха сиригэр эдэр дьоҥҥо аналлаах эбии өйөбүл миэрэтин регион баһылыга Айсен Николаев көҕүлээһининэн киллэрдилэр. Бүгүн, алтынньы 18 күнүгэр, Ил Түмэн пленарнай мунньаҕар норуот депутаттара бастакы ааҕыыга туһааннаах сокуон барылын ылыннылар.
25 саастарыгар диэри ыал буолбут Саха сирин олохтоохторугар көмө харчыны 2024 сыл тохсунньу 1 күнүттэн саҕалаан биэриэхтэрэ. Көмө харчы суумата этиллэ илик, ол эрээри саҥа дьаһалы олоххо киллэриигэ 85 мөл. солк. сыллата көрүөхтэрэ.
