Тыа хаһаайыстыбатынан дьарыктанар дьоҥҥо 2022 сылтан Арассыыйаҕа «Агротуризм» диэн саҥа грант баар буолуоҕа. Бырабыыталыстыба бэрэссэдээтэлэ Михаил Мишустин, тыа хаһаайыстыбатын судаарыстыбаннай сайдыытын бырагырааматын уларытары бигэргэттэ, диэн РФ Кабмина иһитиннэрэр.
Грант муҥутуур кээмэйэ 10 мөл. солк. тэҥнэһэр. Судаарыстыба өйөбүлүн тыа хаһаайыстыбатын туризмын сайыннарыы бырайыагынан дьоҕус аграрнай бизнес бэрэстэбиитэллэрэ ылыахтарын сөп. Маннык бырайыак чэрчитинэн, туристарга аналлаах объектары тутуохха эбэтэр өрөмүөннүөххэ син, аттынааҕы территориялары тупсарыахха, аралдьытар инфраструктураны тэрийиэххэ, туристическай оборудованиены уонна инвентары атыылаһыахха сөп.
Бырайыак сабыллар болдьоҕо биэс сылтан үрдүө суохтаах. Бырайыакка сорох үбүн урбаанньыт бэйэтэ угуохтаах. Ол курдук, 3 мөл. солк. диэри грант ыларга 10% урбаанньыт уйунар, 5 мөл. солк. – 15%, 8 мөл. солк. – 20%, 10 мөл. солк. диэри – 25 %- тан итэҕэһэ суох.
Грант ыларга бырайыактары талааһыны тыа хаһаайыстыбатын министиэристибэтэ ыытыаҕа.
2022 сылга федеральнай бүддьүөттэн граннары биэриигэ 300 мөл. солк, 2023 сылга – 500 мөл. солк, 2024 сылга – 700 мөл. солк. көрүллүөхтээх.
Саҥа өйөбүл миэрэтэ тыа сирин нэһилиэнньэтин дьарыктаах буолуутугар үчүгэйдик дьайыаҕа, тыа хаһаайыстыбатын бородууксуйатын атыылааһын элбэтиэҕэ уонна уопсайынан регионнар экономикаларын сайыннарыыга көмөлөһүөҕэ.
