Словацкайдааҕы массыынаны оҥорор AeroMobil көтөр массыыналары 2017 сылга ырыынакка таһаарар соруктаах. Экспердэр сабаҕалыылларынан, дьикти массыына 200 000 евро сыаналаах буолуо.
Аэромобиль чэпчэки мотуордаах көтөр аалга майгынныыр.
Бу массыына чааска 160 км.түргэтиир, наада буоллаҕына салгыҥҥа көтөн тахсар кыахтаах. Көтөрүгэр 300 м. уһуннаах көнө суол наада. Ити туһунан «Информинг» портал иһитиннэрэр.
Массыына уруулугар олорооччулар суоппар дастабырыанньатын таһынан пилот лицензиятын ылыахтаахтар.
Бүгүҥҥү туругунан хас да маннык бырайыак боруобаланар. АХШ гражданскай авиациятын управлениетын сертификатын аан дойдуга бастакынан Airphibian ылбыта. Ол эрээри кинилэр массыынаны маассабайдык таһаарыыга диэри тиийбэтэхтэрэ.
