Ыам ыйын 6 күнүгэр Саха сирин үрдүнэн араас көрдөрүүлээх күн-дьыл туруга бэлиэтэнэр. Хотугулуу-арҕаа инчэҕэй хаар түһэр буоллаҕына, соҕуруулуу-арҕаа сайыҥҥылыы +22 кыраадыска тиийэ итии буолуоҕа.
Ол туһунан ЯУГМС саайтыгар суруллар.
Инчэҕэй хаар Анаабыр, Булуҥ оройуоннарыгар, ардах — Өлүөнэ алын тардыытыгар бэлиэтэнэр. Сайыҥҥы күн Өлүөхүмэ, Ленскэй олохтоохторун үөрдүөҕэ. Ленскэйгэ, Мииринэйгэ, Өлөөҥҥө күүһүрэн кэлэр кэмигэр сөкүүндэҕэ 10-14 миэтэрэ түргэннээх тыаллаах.
Сылаас күн-дьыл Саха сирин киин улуустарыгар кэллэ, синоптиктар борогунуостарынан, +11 — +16 кыраадыс буолар. Хоту уонна хотугулуу-арҕаа +5 — +10, соҕуруулуу-арҕаа — +17 — +22.
Дьокуускайга күнүс +15 кыраадыс, сөҥүүтэ суох, тыала сөкүүндэҕэ 2-5 м түргэннээх.
Санаттахха, Ленскэй оройуонун туһаайыытынан ыам ыйын 5 күнүгэр муус хамсааһына саҕаланна. Ленскэйгэ муус ыам ыйын 8-9 күннэригэр кэлэрэ былааннанар — 3-4 суукка нуорматтан эрдэлээн.
