19 От ыйа 19.07
  • 21°
  • $ 87,88
  • 96,1

Юрий Куприянов тыа хаһаайыстыбатын министиэристибэтэ оттооһуну хонтуруоллууругар сорудахтаата

16:58, 26 июля 2016
Текст:
Читайте нас на
Яндекс Новости
ЯДВ

Бастакы вице-премьер э.т. – Саха сирин баһылыгын уонна бырабыыталыстыбатын дьаһалтатын салайааччы Юрий Куприянов улуустар үлэлэрин сүрүннүүр куратордарга оттооһуҥҥа кэккэ сорудахтары биэрдэ.


Тохтообот ардахтан сорох оройуоннарга оттооһун графига кэһилиннэ. Тыа хаһаайыстыбатын, ас-үөл политикатын миниистирин солбуйааччы Афанасий Семёнов этэринэн, бүгүҥҥү туругунан 31 938 тыһ. гектар сир охсуллубут. Бу былырыыҥҥы көрдөрүү 47%. Уопсайа 12 992 тонна от бэлэмнэннэ. Ити былырыыҥҥы көрдөрүү 32%.

«Үөһээ Халыма, Үөһээ Дьааҥы, Эбээн-Бытантаай, Муома, Өймөкөөн, Ленскэй, Таатта улуустарыгар ыарахан быһыы-майгы үөскээтэ. Манна оттооһун көрдөрүүтэ былырыыҥҥы нуорма 30% эрэ ылар», — диир Семёнов.

Миниистири солбуйааччы бырабыыталыстыба бэрэссэдээтэлэ Галина Данчикова улуус бэрэстэбиитэллэрин кытта оттооһун туһунан ырыппытын ыйда. Ити көрсүһүү түмүгүнэн ыарахан быһыы-майгы үөскээбит улуустарга оробуочай бөлөҕү ыытар туһунан быһаарыы ылыллыбыт. «Бу улуустарга ыытыллыбыт үлэ түмүгүн бөлөхтөр атырдьах ыйын 15 күнүгэр тыа хаһаайыстыбатын министиэристибэтигэр билиһиннэриэхтэрэ. Итиниэхэ олоҕуран министиэристибэ уонна бырабыыталыстыба тустаах быһаарыылары ылыахтара», — диэтэ Афанасий Семёнов. Аһылык сорох көрүҥнэрин тиэрдии тырааныспарга ороскуотун биэдэмистибэ толуйуоҕар кини тохтоото.

Миниистири солбуйааччы бэлиэтээбитинэн, холобур, Муома улууһун дьаһалтата тыа хаһаайыстыбатынан дьарыктанааччыларга тэрилтэлэри сыһыарбыт. «Нэһилиэк, улуус бюджеттарыттан үп-харчы көрүллүөхтээх. Бу боппуруос миэстэтигэр чопчу быһаарыллыахтаах», — диир кини.

Дакылааты истэн баран Юрий Куприянов күн-дьыл уларыйыытын, хас биирдии нэһилиэк төһө үлэни оҥоруохтааҕын туһунан куратордарга тыа хаһаайыстыбатын министиэристибэтэ иһитиннэрии биэрэригэр эттэ. Оттон куратордар нэһилиэктэр министиэристибэни кытта ыкса ситимнээхтик үлэлииллэрин хааччыйыахтаахтар. «Наадалаах быһаарыылары ылынаммыт, балаҕан ыйыгар диэри балаһыанньаны көннөрүөхпүт», — диэтэ бастакы вице-премьер э.т.

Следите за самым важным и интересным в Telegram-канале и WhatsApp-группе ЯСИА