24 От ыйа 24.07
  • 29°
  • $ 87,3
  • 95,46

«Ыллыыр мыраан»: Уон сыл бииргэ

15:35, 21 июля 2016
Читайте нас на
Яндекс Новости
ЯДВ

СӨ култуура туйгуна, СӨ ыччат политикатын туйгуна, Кэбээйи улууһун бочуоттаах мецената, Сунтаар улууһугар Тойбохойго тулаайах оҕолору иитэр дьиэ мецената Клим Федоров «Ыллыыр мыраан» диэн өрөспүүбүлүкэ оҕолоругар аналлаах сайыҥҥы лааҕыры тэрийэн үлэлэппитэ номнуо уон сыл буолла. Бүгүн Клим Федоров лааҕырын үлэтин-хамнаһын туһунан билиһиннэрдэ.


«Кыбыстанньаҥ, муҥкук оҕо дьоҕурун дьоҥҥо-сэргэҕэ көрдөрбөт, биллэрбэт. Биһиги лааҕырбыт ону туоратан, оҕо бэйэтин  иннин быһаарсар киһи буола улаатан, үүнэн-сайдан тахсарыгар, сырдыкка, кэрэҕэ дьулуһарыгар тирэх буолар уонна онно сирдиир сыаллаах-соруктаах үлэлэһэр. Манна өрөспүүбүлүкэ бары улуустарыттан сайын аайы биэс саастаах кырачааннартан саҕалаан уон биирис кылааска үөрэнэр оҕолорго тиийэ кэлэллэр. Сайын устата алта сезон үлэлиир. 15 күҥҥэ 40-ҕа чугаһыыр оҕо сылдьар. Эстрада биллиилээх ырыаһыттара маастар кылаастары биэрэллэр, ыллыырга,  кэнсиэргэ биллэрээччи буоларга уһуйаллар. Сергей Сивцев, Далаана, Ника, Лэгэнтэй, о.д.а. дьон-сэргэ биһирэбилин ылбыт ырыаһыттар кэлэн оҕолору кытта көрсөллөр, ыйытыыларга хоруйдууллар, сценаҕа тутта-хапта сылдьарга үөрэтэллэр. Оҕолор сэттэ күн дьарыктаммыттарын кэннэ, Медицинэ киинигэр, кырдьаҕастар дьиэлэригэр, пааркаҕа үтүө санааланыы чэрчитинэн кэнсиэрдэри көрдөрөбүт», — диир Клим Федоров. Ону таһынан пааркаҕа, киинэлэргэ, тыйаатырдарга сылдьаллар, музейдарга экскурсиялыыллар, боулинныыллар. Лааҕырдарын тэлгэһэтигэр оонньуу, күрэхтэһии арааһа ыытыллар. Бэлиэ тэрээһиннэригэр төрөппүттэри ыҥыран ыалдьыттаталлар.

«Ыллыыр мырааны» сөбүлээн сыл ахсын кэлэр оҕолор элбээбиттэр. Ону сэргэ 2006 сыллаахха бу лааҕырга сылдьыбыт кыыс, билигин биэс оҕо ийэтэ, улахан оҕотун лааҕырга быйыл иккис сылын ыыппыт. Аны туран, Клим Федоров хаһан эрэ сыбаайбаларын салайбыт, иилээбит-саҕалаабыт эдэр ыалларын оҕолоро эрдэттэн үлэһэн кэлэр буолбуттар. Кэллэктиип лааҕыртан уһуйуллан тахсыбыт Сергей Сорокин — эстрада ырыаһыта, Альберт Алексеев — Саха драматическай тыйаатырын артыыһа, Эрхан Попов — «ZAVOD» бөлөх солиһа буолан айа-тута сылдьалларыттан үөрэр. Меценат бу үлэтин таһынан, Кэбээйигэ сыл ахсын оскуола оҕолоругар «Ыллыыр мыраан» диэн куонкуруһу тэрийэр, Тойбохойго тулаайах оҕолор дьиэлэрин кытта ыкса ситимнээх үлэлээбитэ алтыс сылыгар барбыт.

Лааҕырга чуҥкуйар бириэмэ суох. Балаҕан ыйыттан улахан дьон сынньанар үгэстэммит. Клим үксүн санааҕа-онооҕо баттаппыт дьон кэлэн ырыанан эмтэнэн, тосту уларыйан, сырдаан, санаалара күүһүрэн барар буолбуттарын бэлиэтиир. Бу курдук «Ыллыыр мыраан» кэллэктиибэ үлэтин сайыннаран, тупсаран, туһатын улаатыннаран иһэр соруктаах.

Следите за самым важным и интересным в Telegram-канале и WhatsApp-группе ЯСИА