БКЭ-ни туттарыы
Дойду үрдүнэн БКЭ-ни туттарыы болдьоҕо муус устар 23 күнүттэн саҕаланар. Историяҕа, литератураҕа уонна химияҕа эксээмэннэр буолуохтара. Ыам ыйын 27 күнүгэр выпускниктар баазовай уонна профильнай таһымнаах биридмиэттэри — математиканы, оттон ыам ыйын 30 күнүгэр — нуучча тылын туттарыахтара. Бэс ыйын 2 күнүгэр оскуола оҕолоро обществознание, физика, бэс ыйын 5 күнүгэр – биология, география, омук тыла биридимиэттэргэ билиилэрин тургутуохтара. Бу күн информатикаҕа эмиэ эксээмэн ыытыллыаҕа.
Тус дааннайдары туһаныы иһин ыстараап көрүллэр
Ыам ыйын 30 күнүттэн гражданнарга ыстарап суумата 2-6 тыһ. солкуобайтан 10-15 тыһ. солк. диэри улаатар, тэрилтэлэргэ 60-100 тыһыынчаттан 300-500 тыһ. солк. диэри эбиллэр. Тэрилтэлэргэ тус дааннайдары сокуоннайа суох туһаныыны, тарҕатыыны кытта сибээстээх 3 мөл. солк. ыстараап көрүллэр уонна маассабайдык тарҕатыы иһин 15 мөл. солк. диэри ыстарааптаналлар.
IТ-хампаанньалары аккредитациялааһын болдьоҕо түмүктэнэр
Сайабылыанньаны «Госуслуги» портал нөҥүө ыам ыйын 7 күнүттэн бэс ыйын 1 күнүгэр диэри биэриэххэ сөп. Сайабалыанньаҕа ІТ хампаанньа дохуота, тэрилтэ саайтын сигэтэ, дохуот туһунан дааннайдар, о.д.а. суруллаллар. Ону сэргэ нолуок кистэлэҥнэрин арыйыыга сөбүлэҥ докумуонун эмиэ саҥардыахха наада.
Блогердарга туспа ОКВЭД киириэҕэ
ОКВЭД классификаторыгар саҥа куодтар киириэхтэрэ. Социальнай ситимнэринэн иһитиннэриилэри тарҕатыыга уонна угуйугу туһаныыга блогердарга саҥа ОКВЭД баар буолар. Бу ирдэбили ыам ыйын 1 күнүттэн толоруохха наада.
Иноагеннары билинии төрүөтэ кэҥиир
Биһиги дойдубутугар иноагеннарынан билинэллэр — дойдубут кыттыспат норуоттар икки ардыларынааҕы тэрилтэлэр быһаарыыларын толорууга көмөлөспүттэр; дойдугу куттала суох буолууну утары тас дойдулар судаарыстыбаннай тэрилтэлэригэр көмөлөспүттэр, сокуоннай саастарын ситэ илик оҕолору бу дьайыыларга кыттыһыннарбыттар, байыаннай-тэхиниичэскэй дааннайдары хомуйан тарҕаппыттар.
Пилота суох аппарааттартан көмүскэнии
Биэдэмистибэннэй охрана үлэһиттэригэр пилота суох аппарааттары утары харабыллыыр эбийиэктэргэ, о.д.а сирдэргэ сааны туһаныахтарын сөп буолар.
