Саха боксердара ааспыт Россия чемпионатыгар икки мэтээллээхтэр. Атлеттар уопсай киирсиилэрэ үрдүк таһымнааҕа бэлиэтэннэ. Саха сирин сүүмэрдэммит хамаандатын флагмана, Россия спордун үтүөлээх маастара Василий Егоров спортсменнар бэлэмнэрин таһымын уонна кылаабынай тренер профессионализмын сыаналаата, суруйар СИА.
«Эдэр боксердары бэлиэтиибин. Саха сирин хамаандатыгар уруккуттан баарбын. Билиҥҥи чемпионаты ылан көрөр буоллахха, биһиги оҕолорбут сайдаллар, инники киирэн иһэллэр. Уолаттарбыт кэскиллээхтэр уонна улахан кыахтаахтар. Кылаабынай тренер Владимир Павлов өссө үчүгэйдик үлэлииригэр эрэллээхпин: мин дьарыктарыгар сырыттым, хайдах эрчийэрин көрдүм, оҥорон таһаарыыта үрдүк. Маннык үлэлээтэхпитинэ — өссө элбэх мэтээллэниэхпитин, ол иһигэр кыһыл көмүс, сөп», — диэтэ Василий Егоров пресс-конференция кэмигэр.
Санатар эбит буоллахха, Василий Егоров бэйэтин ыйааһыныгар үрүҥ көмүс, оттон Евгений Мартынов боруонсаны иилиммиттэрэ. Стартка барыта 11 боксер тахсыбыта.
