Уус Майа бөһүөлэгэр аныгылыы балыыһа комплексын тутуута салҕанар, билигин үһүс мэндиэмэнин тута сылдьаллар. Үлэни 2023 сыл төрдүс кыбаарталыгар бүтэрэр былааннаахтар, диэн СИА-ҕа регион баһылыгын уонна бырабыыталыстыбатын пресс-сулууспата иһитиннэрдэ.
«Тутуу графиктан хаалыыта суох үчүгэй тэтиминэн баран иһэр. Билигин 40 кэриҥэ киһи тутар-таҥар үлэнэн дьарыктанар. Тутуу үлэтин күн-дьыл тымныйыар диэри салгыыр былааннаахтар»,- диэн Уус Майа оройуонун балыыһатын кылаабынай бырааһа Татьяна Рогожина кэпсээтэ.
Татьяна Рогожина бэлиэтээбитинэн, балыыһа урукку дьиэтин Саха сирин баһылыга Айсен Николаев сорудаҕынан ыытыллыбыт госэкспертиза кэнниттэн аварийнай туруктааҕынан билиммиттэр.
Саҥа балыыһа «Доруобуйа харыстабыла» нацбырайыак чэрчитинэн тутулла турар.
