Усуйаана сэлиэнньэтигэр, Дьааҥы өрүскэ муус харыытын дэлби тэптэрии үлэтин түмүгэр, уу таһыма намтаан эрэр.
Бэс ыйын 3 күнүгэр киэһэ 19:00 чааска уу таһыма кутталлаах таһымтан (1023 см) үрдээн 1182 см тиийдэ. Дэлби тэптэрии үлэлэрин кэнниттэн, буоларын курдук, уу бастаан эмискэ тахсар, онтон сыыйа түһэр, диэн Саха сирин Быыһыыр сулууспата иһитиннэрэр. Киэһэлик уу таһыма намтаан, 22:00 чааска 1158 см тэҥнэстэ.
Усуйаана сэлиэнньэтигэр халаан уутун ааһыытын түмүгэр барыта 66 тиэргэн уонна 10 социальнай суолталаах эбийиэк ууга барда.
«Усуйаанаҕа уопсайа 199 киһи олорор, онтон 78 оҕо. Аймахтарынан 47 киһини, ол иһигэр 18 оҕону, эвакуациялаатыбыт», — диэн нэһилиэк баһылыга Софья Олесова эттэ.
Иһитиннэриллибитинэн, сэлиэнньэ олохтоохторо аһынан-үөлүнэн уонна иһэр уунан хааччыллыбыттар, быстах кэмҥэ олорор пууна (ПВР) тэриллибит.
