Дьааҥы оройуонугар сайыҥҥы халаан уутун кэнниттэн чөлүгэр түһэрэр үлэни ыытарга устудьуоннар тутар этэрээттэрин ыытыахтара. Дьаһал боппуруостарын гражданскай оборуона дьыалаларыгар уонна регион нэһилиэнньэтин олоҕун-дьаһаҕын куттала суох буолуутун хааччыйыы миниистирэ Дмитрий Лепчиков бэрэссэдээтэллээх мунньахха дьүүллэстилэр.
Сүрүн соруга — Суордаах, Дулҕалаах уонна Сайдыы сэлиэнньэлэрин олохтоохторугар олорор дьиэни чөлүгэр түһэриигэ көмөлөһүү. Этэрээттэри тэрийиигэ ЧС кэнниттэн үлэни ыытыы уопутун учуоттуохтара. Бастакы барыы бу нэдиэлэҕэ былааннанар, болдьоҕо күн-дьыл уонна авиация бэлэм буолуутуттан тутулуктаах.
Суордаах уонна Сайдыы сэлиэнньэлэриттэн 52 оҕоҕо Дьокуускайга «Энергетик» лааҕырга сынньалаҥ тэрийэллэр.
Ону таһынан, доруобуйа харыстабылын министиэристибэтэ Дьокуускайтан Дьааҥы оройуонугар ыытарга эми-тому, бэрэбээскэлиир матырыйааллары уонна хаһаайыстыбаннай туттар тэрили бэлэмнээтэ.
Тустаах биэдэмистибэлэргэ уонна дьаһалтаҕа алдьаммыт дьиэлэри көрүү кэнниттэн көмөҕө наадыйыыны быһаарарга сорудахтанна.
Санатан эттэххэ, от ыйын 29 күнүгэр Арассыыйа ЫБММ Хабаровскай авиационнай-быыһыыр киинин Ми-8 бөртөлүөтэ Дьааҥы оройуонун Сайдыы сэлиэнньэтигэр гуманитарнай таһаҕаһы кытта икки рейс оҥорбута.
