23 От ыйа 23.07
  • 28°
  • $ 87,78
  • 95,76

Уоппускабыт быйыл хайдах буолар?

17:03, 20 апреля 2020
Текст:
Читайте нас на
Яндекс Новости
ЯДВ

Ыарыыттан сылтаан күннээҕи олохпутугар, ордук үлэбитигэр сыһыаннаах элбэх буккуур-тэккиир таҕыста. Ол иһигэр тэрилтэлэргэ сыл анараа өттүгэр таҥыллыбыт уоппускалар уочараттара уларыйан, ким хаһан сынньана барара буккуллан хаалла.


Бу дьалхааннаах сылга тэрилтэ үлэһиттэригэр уоппуска хайдах быһыылаахтык бэриллэрин быһаарсан көрүөҕүҥ, диэн суруйар edersaas.ru
Хас биирдии үлэһиккэ сокуон быһыытынан 28 күн уоппуска бэриллэр, ол туһунан туох даҕаны мөккүөр суох. Олортон 14 күнү быыстала суох кэлимсэ ылыллар — ити быраабылата эмиэ уларыйбат. Ол эрээри, быйыл дьон сынньалаҥыгар бэриллэр кэм кыччыыра саарбаҕа суох. Сыл маҥнайгы аҥаарыгар былааннаммыт уоппускалар көһөллөр, оччоҕо сыл бүтүүтэ сынньаныан баҕалаахтар элбээн хаалаллар. Үгүс тэрилтэҕэ бу уустук балаһыанньа буолара буолуо. Ону таһынан, ханнык баҕарар табыгастаах кэмҥэ уоппусканы быһа ылар бырааптаах үлэһиттэр баалларын учуоттуохха наада. Сокуон аата сокуон.
Уочарата суох уоппуска ылар бырааптаах үлэһиттэргэ киирсэллэр:
— 3 ыйдарыгар диэри саастаах оҕону иитэ ылбыттар (РФ ТК 122 ыст.);
— төрөөрү, оҕо көрөөрү дэкириэккэ барааччылар (ст. 122, 260 ТК РФ);
— дэкириэккэ барбыт дьахталлар кэргэттэрэ (РФ ТК 123 ыст.);
— сокуоннай саастарын ситэ илик үлэһиттэр (РФ ТК 122, 267 ыст.);
— байыаннай сулууспаҕа сылдьар дьон кэргэттэрэ (ФЗ- 76 ст. 11 ыст.)
— үлэлии сылдьар инбэлииттэр (ФЗ- 5, ст. 14, 16, 17,18, 19);
— Сэбиэскэй Сойуус уонна Арассыыйа дьоруойдара (ФЗ-4301-1, ст. 8);
— иккис үлэлээх дьон, кинилэр сүрүн үлэлэрин уоппуската сайын ылыллыбыт буоллаҕына (РФ ТК 286 ыст.);
— бочуоттаах донордар (ФЗ- 125 ст. 23-1-1-1);
— элбэх оҕолоох ийэлэр, инбэлиит оҕолоох төрөппүттэр (РФ ТК 262.1, 262.2 ыст.)
Муус устарга түбэспит уоппускалар уһатыыга эбэтэр көһөрүүгэ түбэспэттэр. Билиҥҥи үлэттэн босхоломмут күннэр бырааһынньык күннэринэн ааҕыллыбаттар. Ол туһунан Үлэ министиэристибэтэ тустаах суруктара туоһулууллар.
Харантыын да буоллар, үлэһит уоппускаҕа барарыгар күһэллэр. Арай үлэ биэрээччи бэйэтэ баҕа өттүнэн көһөрөр буоллаҕына көһөрүөн сөп. Ол эрэн маннык кыбытык кэмҥэ ити курдук быһаарыныы ылыллара саарбахтардаах, арай, уоппуска кэлэр сылга көһөрүллүөн сөп. Ону Үлэ кодекса утарбат.
Бэйэни хааччахтаныы аны биир соһуччу моһуогу аҕалла — илии баттааһына. Холобур, үлэһит уоппускаҕа барыан икки нэдиэлэ иннинэ биллэриэхтээх уонна үлэ биэрээччи сэрэтиллибитин бигэргэтэр илии баттааһыны ылыахтаах. Күннээҕи олоххо судургу дьаһал эмискэ ыараан тахсар. Сирэй көрсүбэккэ хайдах докумуоҥҥа илии баттанара буолла? Өссө биир кыһалҕа — уоппускаҕа барааччы харчытын үс күн иннинэ тутуохтаах. Билиҥҥи кырыымчык күннэргэ ити эмиэ уустуктардаах буолуон сөп.
Илии баттааһыны маннык ньыманан быһаарыахха сөп. Электроннай почтанан сайабылыанньаны ыытан баран, сурук тутуллубутун туһунан бигэргэтии харданы ылыахха наада. Эбэтэр, атын үлэһиттэр туоһу буолалларын курдук, үлэҕэ туттуллар уопсай мессенджерга, уоппуска сайаапкатын суруйуохха сөп. Бу түгэҥҥэ салайааччы сайаапканы көрбүтүн туһунан мессенджерга харда суруйуохтаах. Онтон кэнники, бэйэни хааччахтаныы эрэһиимэ түмүктэннэҕинэ, докумуоннары толоруохха сөп буолуо.
Ол гынан баран, үлэһит уоппускатын кэмигэр ыалдьыбыт буоллаҕына, ол туһунан бырааска бигэргэтэн, больничнай ылыан сөп. Оччоҕуна ол күннэрэ туһунан ааҕыллыахтаахтар. Бүлүтүөнү ыалдьан эрэ буолбакка, араас биричиинэнэн ылыахха сөп. Холобур, пандемияттан сибээстээн оҕо уһуйаана сабыллыбыт буоллаҕына төрөппүттэриттэн биирдэстэригэр больничнай бэриллиэн сөп. Оҕону кытта олорорго анаан. Коронавируска сутуллубут киһи эмиэ, биллэн турар, больничнай ылар.
Следите за самым важным и интересным в Telegram-канале и WhatsApp-группе ЯСИА