Бэҕэһээ Владимир Путин пресс-конференциятын кэмигэр Уһук Хоту уонна онно тэҥнээх сирдэр олохтоохторо көһүүлэрин бырагыраамата Россияҕа салҕанан барарын эттэ.
Судаарыстыба баһылыгар Коми суруналыыһа ыйытыы биэрэригэр ордук болҕомтону инбэлииттэр уонна биэнсийэлээхтэр көһүүлэригэр ууралларыгар эттэ.
«Бырагырааманы кэҥэтии наадалаах. Дьон олоҕун тухары хоту үлэлээн баран, олохторун ханнык эрэ кэрчигэр сылаас килиимэттээх региоҥҥа олоруохтарын баҕарар. Кылаабынайа, бырагыраама салҕанар. Ороскуот туһунан этэр буоллахха, эһиилги бюджет тыырыллан турар, ити эрээри эбии дохуоттар баар буолуохтарын сөп, ол чааһын көрүөхпүт. Чэпчэтиинэн туһаныахтаах дьон туһунан этии үчүгэй, маны биһиги бырабыыталыстыбаны кытта дьүүллэһиэхпит», — диэтэ президент.
