26 Балаҕан ыйа 26.09
  • 19°
  • $ 73,19
  • 86,89

“Туора” ферматын ыанньыксыттара мэччирэҥ номнуо кыччаабытын бэлиэтииллэр

Амма улууһун “Бөтүҥ” кэлэктиибинэй хаһаайыстыбатын “Туора” ферматын сайылыгар күҥҥэ тоннаттан тахса үүтү ыыллар. Үүт өссө үрдүөҕүн төрүөх арыый хойутаабыт уонна мэччирэҥ номнуо халтаҥнаабыт.


“Туора” ферма сайылыкка күн бүгүн 125 ынаҕы түөрт ыанньыксыт көрөр-истэр. Бары да уопуттаахтар, хаһыс да сайыннарын сайылыкка тахсан үүт түгэҥҥэ үлэлииллэр. Ферма старшайынан Светлана Тарбахова саҥа ананан түбүгүрэр. Бэйэтэ ньирэйдэри көрөр-истэр. Онтон ферма наставнига аатырбыт ыанньыксыт, Аҕа дойду иннигэр үтүөлэрин иһин уордьан IV степенин кавалера Аграфена Егоровна Сутакова буолар. Онон эдэрдэр туохха эмит мунаахсыйдылар эрэ, эбээ Араппыайдарыттан ыллыктаах сүбэни ылаллар.

Биһиги сайылыкка ыам ыйын 20 күнүгэр Ньукуолуну көрсө оруобуна тахсыбыппыт. Түөрт ыанньыксыт, 3 ньирэй көрөөччү, икки бостуук баарбыт. Быйыл төрүөхпүт хойутаата. Манна сайылыкка тахсан баран 20 ынах төрөөтө, өссө да төрүөхтээхтэр. Билигин манна 170 ньирэйдээхпит. Кыраларбытыгар күннээҕи үүппүтүттэн 400 киилэ курдугу иһэрдэ турабыт. Күҥҥэ ферма үрдүнэн 1 тонна 200-тэн тахса киилэни ортотунан ыыллар. Ыанньыксыттар бары хаһыс да сылларын үлэлииллэр, уопуттаахтар. Үүппүт өссө үрдүө этэ да, аны бу кураан күн-дьыл туран мэччирэҥмит олох халтаннаан бүттэ. Аһыҥа да элбээн эрэр. Онон саатар кыратык да ардыыра буоллар диэн баҕалаахпыт”, — диэн этэр старшай Светлана Тарбахова.

Ферма биир уопуттаах ыанньыксытынан Константин Давыдов буолар. Константин Егорович хаһаайыстыбаҕа 1992 сылаахтан ыла үлэлиир. Бостууктаан, оробуочайдаан, ыанньыксыттаан илиитин хара үлэттэн араарбакка сылдьар. “Быйылгы сайыны көрсө 30 ынахпыттан 17-тэ эрэ төрөөтө, 13-һэ кытараатылар. Онон үүтүм былырыыҥҥытан аҕыйах. Ол гынан баран кыһын эрдэ төрөөн, былааммын ситиэм, үүтү ыам диэн эрэллээхпин. Мэччирэҥмит саатар үчүгэйдик ситэрэ буоллар, үүтү син ыа этибит”, — диэн ыанньыксыт киһи кыһалҕатын үллэстэр.

Сайылыкка быйыл үүт ситимэ киириэхтээх эбит да, туохтан эрэ иҥнэн киирбэккэ турарыттан үлэһиттэр санаарҕыыллар. Онон уруккулуу илиилэринэн таһа сылдьаллар. Асчыт Марианна Неустроева ыам аайы үүт син кыралаан эбиллэр диир.

Билигин урукку курдук үстэ ыыллар. Үүт таһар массыына билиҥҥитэ биирдэ кэлэн барар эбит. Мотуор тыаһа тирилээн, ынах ыыр аппарат оргууй үүт ыан сирдиргэтэн, сайылык биир күнэ ити курдук ааһар, суруйда «Амма олоҕо» хаһыат https://www.instagram.com/amma_olo5o/

26 сентября 26.09
  • 19°
  • $ 73,19
  • 86,89