«Туймаада» судаарыстыбаннай вокальнай ансаамбыл быйылгы ХХХ кэнсиэртиир сезонун үрдүк ситиһиилэрдээх көрсөр. Ансаамбыл уус-уран салайааччыта, СӨ искусствотын үтүөлээх деятелэ Светлана Павловна Иванова «Арассыыйа искусствотын бочуоттаах деятелэ» үрдүк ааты ылла.
Светлана Иванова туппут наҕараадатын «Гражданскай уопсастыба» регионнар икки ардыларынааҕы уопсастыбаннай тэрилтэ бырабылыанньата аныыр. «Арассыыйа искусствотын бочуоттаах деятелэ» аат үрдүк таһымнаах үлэлээх архитектордарга, режиссердарга, хормейстердарга, искусствоведтарга, артыыстарга уонна искусство атын да деятеллэригэр тус өҥөлөрүн иһин ананар.
Балаҕан ыйын 27 күнүгэр, Саха Өрөспүүбүлүкэтин Судаарыстыбаннаһын күнүгэр, СӨ Ил Дархана Егор Борисов, үгэс курдук, РФ уонна СӨ судаарыстыбаннай наҕараадаларын туттарда. Өрөспүүбүлүкэ уонна дойду социальнай-экономическай сайдыытыгар ураты кылааттарын киллэрэн үрдүк наҕараадаҕа тиксибит үтүөлээх дьон ортотугар «Туймаада» судаарыстыбаннай ансаамбыл солиһа Андрей Тарабукин баар. Андрей Тарабукин ансаамбыл тэриллиэҕиттэн үлэлиир, ансаамбыл солиһа.
«Туймаада» ансаамбыл ырыаларын араас саастаах дьон сөбүлээн истэр. Ансаамбыл Арассыыйа куораттарынан, Украинаҕа бэйэтин бырагырамаатын билиһиннэрбитэ. Ырыаһыттар 1994 с. Япония Токио, Саппоро, Асахикава, Нийгата, Кессенума, Хакодате, Мурояма куораттарын олохтоохторун сүрэхтэрин туппуттара. Ону таһынан Польшаҕа Хотугу норуоттар аан дойдутааҕы бэстибээллэригэр, Италияҕа «Виват, Италия — Россия!» бэстибээлгэ Саха сирин аатын дорҕоонноохтук иһитиннэрбиттэрэ.
«Туймаада» судаарыстыбаннай ансаамбыл сүгүрүйээччилэрэ тапталлаах артыыстарын балаҕан ыйын 30 күнүгэр «Туймаада» кэнсиэртиир саалатыгар көрсүөхтэрэ. Бу күн «туймаадалар» көрөөччүлэргэ Муусука күнүн чэрчитинэн «Мин ырыам» кэнсиэртэрин бэлэхтиэхтэрэ.
Ону сэргэ эр дьон ырыаһыттар толорууларыгар «Мин ырыам» диэн саҥа килиип сүрэхтэниэҕэ.
ЫСПЫРААПКА:
Светлана Иванова – Н.А.Римскэй-Корсаков аатынан Ленинградтааҕы судаарыстыбаннай консерваторияны бүтэрбитэ. 1987 с. «Туймаада» ансаамбылы тэрийбитэ. Ансаамбылга М.Н.Жирков аатынан музыкальнай училище вокальнай уонна дирижерскай-хоровой отделениетын устудьуоннара ылыллыбыттара. Ансаамбыл 1993 с. СӨ судаарыстыбаннай вокальнай ансаамбыл анал аатын ылбыта. Билигин Арассыыйа, омук сирдэригэр киэҥник сураҕырар ырыа биир бастыҥ кэлэктиибэ.
