Хаҥалас улууһун Тиит-Эбэ сэлиэнньэтигэр Аҕа дойду улуу сэриитигэр фроҥҥа барбыт биир дойдулаахтарын кэриэстээтилэр. Кыайыы күнүн көрсө олохтоохтор «Үүттээх бэскэ» Сэргэ стелатыгар сибэкки дьөрбөтүн ууруу сүргэлээх сиэрэ-туома буолла.
Бу сир Ытык сиринэн ааҕыллар. Чуолаан мантан 1-кы Дьөппөн эр дьоно дойдуларын фашизмтан көмүскүү айаҥҥа туруналлара.
Нэһилиэктэн сэриигэ 203 киһи барбыт, 96 киһи эргиллибэтэх, 49 киһи сураҕа суох сүппүт.
Өйдөбүнньүк стела 2020 сыл ыам ыйыгар — Кыайыы 75 сылыгар — туруоруллубута. Тиит-Эбэттэн төрүттээх Юрий Федорович Федоров көҕүлээһинэ буолар. Тиит-Эбэ сэлиэнньэтин дьаһалтата саҕалааһыны өйөөн, үбүлээбитэ. Сэргэ стела — дьиэлэригэр төннүбэтэх дьоҥҥо өйдөбүнньүк, көлүөнэлэр ситимнэрэ уонна кутурҕан бэлиэтэ буолар.
Ытык сир аттыгар хас да көлүөнэ бэрэстэбиитэлэ муһунна. Сиэргэ-туомҥа ол тыйыс сыллар тыыннаах туоһулара — сэрии оҕолоро — кытыннылар. Кинилэр фроҥҥа барбыт эһэлэрин, аҕаларын, убайдарын, бырааттарбыт, биир дойдулаахтарын тус ыарыылара, өйдөрө-санаалар буолаллар.
Оскуола оҕолоро историческай миэстэҕэ дойду иннигэр бэриниилээх буолуу өйдөбүлүн иҥэрилиннилэр.
Дьаһалта, култуура үлэһиттэрэ тэрийэн ыыттылар, диэн СИА-ҕа суруйда Луиза Матвеева.
