29 Тохсунньу 29.01
  • -48°
  • $ 73,82
  • 83,32

Томпоҕо саҥа кинигэ Кыайыы фондатыттан үбүлэннэ

16:15, 12 марта 2016
Текст:

«Ол улуу сылларга сүгүрүйүөҕүҥ» кинигэ сүрэхтэниитэ буолла. Тэрээһиҥҥэ кинигэ тахсыытыгар үлэлэспиттэр, буойун-интернационалистар кыттыыны ыллылар. Кинигэҕэ Улуу Кыайыыга томполор кылааттарын туһунан историческай дааннайдар киирбиттэр.


Оройуоннааҕы Сэбиэт бэрэссэдээтэлэ Илья Шадрин: «Бу бүттүүн норуот таһаарбыт кинигэтэ, манна кырдьаҕас уонна эдэр көлүөнэ ахтыылара киирбиттэр. Бу кинигэ — биһиги күннэрбитигэр тиийбэтэх дьон тустарынан кэриэстэбил, тыыл бэтэрээннэригэр ытыктабыл бэлиэтэ», — диэн кэпсээтэ.

Ыытыллыбыт үлэ түмүгэр урукку таһаарыыларга суруллубут 356 сэрии кыттыылааҕын испииһэгин оннугар билигин 629 киһи, 373 сэрии сылларын оҕолоро киирдилэр. Тыыл бэтэрээннэрин олохторун, күнү-дьылы ыйан туран, испииһэктэрэ чуолкайданна. Кыайыыга кылааттарын киллэрбит Охотскай Перевоз с. олохтоохторун, Алданнааҕы балык собуотугар бултаабыт артыаллар үлэлэрэ уонна кылааттара толору сырдатыллыбыт.

Магаданскай трассаны уонна Теплай Ключ авиапордун тутуу туһунан дааннайдар сиһилии суруллубуттар. «Аляска — Сибирь» салгын трассатынан 1942 с. алтынньы 7 күнүттэн 1945 с. сэтинньи 1 күнүгэр диэри Америкаттан Советскай Союзка 7928 самолет аҕалыллыбыта. Ити кэм устата 81 самолет экипаһа сүппүтэ уонна өлбµтэ биллэр. Икки экипаж кырамталара Тополинай с. уонна Хаандыга б. көмүллүбүттэрэ. Бу туһунан кинигэҕэ сиһилии суруллар.

Кинигэ Хотугу-илиҥҥи Федеральнай университет издательствотыгар таһаарылынна. 563 страницалаах, тираһа – 645 экземпляр.  Улуустааҕы Кыайыы фондатыттан 700 тыһ. солк. төлөммүт.

0
0
29 января 29.01
  • -48°
  • $ 73,82
  • 83,32