Өрүс, үрэх уута кэллэҕинэ, этэргэ дылы, бэйэтин «бэлэхтэрин» аҕалар. Онно сороҕор киһи сэргиирин арааһы көрүөххэ сөп.
Өрүс, үрэх уутун кытта ордук үксүн араас мас устан ааһан, кытылга тиксэр. Биир оннук уу аҕалбыт маһын бу күннэргэ түбэһэ көрдүм. Кылгас, силис өттө. Кытылга үүммүт мас силиһин салаалара таастар быыстарынан тарҕаммыт уонна кэлин силбэспит буолуон сөп.
Кыра титирик улаатыар дылы төһө кэм ааспытын ким билиэй?! Таастар устунан силискэ сыстан хаалбыттар, этэргэ дылы, уруурҕаһан олохтоох сирдэрин булбуттар. Кэлин өрүс кытылы суурайбытыгар мас ууга сууллубут бадахтаах.
Төһө өр ханна сыппыта, ханан устубута биллибэт. Ордубут өттө кытылга тиксибит. Ол тухары таастар сыста сылдьаллар, оттон сорохторо тононон түспүттэрэ суолларыттан көстөр.
Хайдах эрэ мас силиһэ таастары эмиэ да киэргэл оҥостубут дуу, олоҕун аргыстара гыммыт дуу дии санаан ылаҕын, диэн суруйда Томпоттон Евдокия Неустроева.
