Ыам ыйын 25–31 күннэригэр Саха сиригэр, доруобуйа харыстабылын аан дойдутааҕы тэрилтэтин (ВОЗ) чэрчитинэн, табахтан аккаастаныы аан дойдутааҕы күнүгэр (ыам ыйын 31 күнэ) анаммыт “Табахтан аккаастаныы” нэдиэлэтэ ыытыллар. Бу туһунан Саха Өрөспүүбүлүкэтин доруобуйа харыстабылын министиэристибэтэ иһитиннэрэр.
ВОЗ дааннайынан, табахтааһын эрдэ өлүү уонна хроническай ыарыылар биир сүрүн төрүөттэринэн буолар. Сыл аайы аан дойдуга 8 мөлүйүөнтэн тахса киһи табах содулуттан өлөр, ол иһигэр табах буруотугар хаптарар дьон эмиэ киирсэллэр. Эмчиттэри үгэс буолбут табаҕы таһынан вейптар, никотиннаах электроннай тэриллэр уонна да атын никотиннаах бородууксуйалар тарҕаныылара долгутар. Куттала суох табах диэн суох, оттон никотиҥҥа тутулук киһи доруобуйатыгар барытыгар куһаҕаннык дьайар.
Нэдиэлэ сыала — табах буортутун туһунан билиини үрдэтии, никотинтан аккаастаныыга көҕүлээһини үөскэтии уонна чөл олоҕу киэҥник тарҕатыы. Табахтан аккаастаныы — уһун үйэлэнии уонна олох хаачыстыбатын харыстааһын кылаата. Бэл, биир эрэ күн сигаретата суох сылдьыы улахан уларыйыыларга тиэрдиэн сөп.
Нэдиэлэ чэрчитинэн телевидениеҕэ мэдиссиинэ үлэһиттэрин таһаарыылара, СМИ-гэ сэрэтэр матырыйааллар бэчээттэнэллэр уонна ыам ыйын 30 күнүгэр 09:00-тан 13:00-гэр диэри Доҕордоһуу болуоссатыгар «Чэгиэн куорат» ыччат аахсыйата былааннаналлар.
