Кэлэр үс сылга Саха сирин Арктикатын оройуоннарыгар 7 тыһыынча км волокно-оптика сибээс ситимин (ВОЛС) тутуохтара, ити өрөспүүбүлүкэ 61 нэһилиэнньэлээх пуунун интернеккэ холбуур кыаҕы биэриэҕэ. Ситим ыаллыы сытар регионнарга тахсан, Россия хотугулуу-илин телекоммуникационнай куттала суох буолуутун хааччыйыахтаах. Ол туһунан быһа сибээс кэмигэр Саха сирин баһылыга Айсен Николаев бэҕэһээ кэпсээтэ.
«Биһиги глобальнай телекоммуникационнай бырайыагы олоххо киллэриэхтээхпит. < … > Чугастааҕы үс сылга Арктиканан 7 тыһыынча км тардыахтаахпыт, ВОЛС-ка 61 Арктика бөһүөлэгин холбуохтаахпыт, хотугу муора суолун кыйа сытар ситимнэргэ тахсан, Чукотканы уонна Магаданы кытта эргийиэхтээхпит. Ити курдук Россия хотугулуу-илин киэҥ сирдэрин телекоммуникационнай куттала суох буолуута ситиһиллиэҕэ. Дьон-сэргэ, ол иһигэр төрүт аҕыйах ахсааннаах омуктар, интернет нөҥүө глобальнай эйгэҕэ сыстыахтарын сөп», — диэн Айсен Николаев бэлиэтээтэ.
Санатан эттэххэ, “Синергия Арктики” диэн Саха сирин хамаандата Россия сыыппараҕа министиэристибэтин кытта бииргэ оҥорбут улахан көҕүлээһинэ буолар. Бырайыак өрөспүүбүлүкэ 61 нэһилиэнньэлээх пуунун 2028 сыл бүтүүтүгэр үрдүк түргэннээх интернеккэ холбооһуну көрөр. Бырагыраама чэрчитинэн 7 тыһыынча км ВОЛС тардыллара былааннанар, онно 50 тыһыынчаттан тахса киһи олорор. Бырайыак оператора — «АрктикТелеком» АУо.
