29 Кулун тутар 29.03
  • -14°
  • $ 92,26
  • 99,71

Саха сирин бөҕөһө Дмитрий Аксенов көҥүл тустууга Россия чемпионатыгар "боруонсаны" ылла

09:30, 14 июня 2017
Текст:
Читайте нас на
Яндекс Новости
ЯДВ

Көҥүл тустууга Россия чемпионатыгар Саха сирин сүүмэрдэммит хамаандатын бөҕөһө Дмитрий Аксенов финалга тахсан, дагестанец Рамазан Ферзалиевы кыайан, боруонса мэтээли иилиннэ.


Чемпионат бэс ыйын 12-14 күннэригэр Ингушетияҕа буола турар. Күрэхтэһии иккис күнүгэр көбүөргэ 57, 86 кг диэри уонна 125 кг ыйааһыннаахтар таҕыстылар. Сахалар икки бастакы бөлөххө кытыннылар. Республика чемпиона Ньургун Сергин (86 кг диэри) бастакы эргииргэ чеченец Муслим Дудаевы кытта киирсэн, хоттордо. 57 кг диэри ыйааһыҥҥа хамаанда биэс тустуугу туруорбута: Михаил Иванов, Арыйаан Тютрин, Айтал Захаров, Федор Постников уонна Дмитрий Аксенов. Уолаттартан Аксенов эрэ мэтээли ылары ситистэ.

Дмитрий Аксенов бастакы киирсиитигэр ХИФУо чемпионун Арсланали Казавовы 12:2 ахсаанынан хотор, онтон уолаттарга аан дойду чемпионатын кыһыл көмүс мэтээлин хаһаайына Абдулвагав Шахбановы 6:1 куоһарар, финал чиэппэригэр «Шахтерская Слава» норуоттар икки ардыларынааҕы турнир кыайыылааҕын Дондук Хуреш-оола 3:1 сабарыйар.

Финал аҥарыгар Аксенов Заур Угуевы кытта киирсэр. Тустуу саха туһугар чэпчэкитэ суохтук ааһар, дагестанец 1:7 ахсаанынан баһыйар. Бу ыйааһыҥҥа чуолаан Угуев чемпион буолар.

Аксенов боруонса иһин тустуута чаҕылхайдык ааста. Көбүөргэ  Али Алиев аатынан норуоттар икки ардыларынааҕы турнир призерун, Дагестан бөҕөһүн Рамазан Ферзалиевы кытта кииристэ.

Тустуу бастакы чааһыгар саха бөҕөһө утарылаһааччытын көҕүстүүр, ити эрээри анарааҥҥыта икки төгүл уолбутун көбүөр таһыгар таһаарар, онон ахсаан 2:2 Аксенов туһатыгар буолар. Иккис чааһыгар Аксенов сытыырхайар, быраҕыы оҥорор, онон 4 баалы сурунар. Дагестанец судьуйалар ити быһаарыыларын кытта сөбүлэспэт, челлендж быраҕар. Арбитрдар быһаарыыларын токуруппаттар, итинэн Аксенов өссө биир баалы сурунар. Чуолаан бу көстүү утарылаһааччылар очкуоларын икки ардын улаханнык тэйитэр. Онон Дмитрий Аксенов 9:4 ахсаанынан кыайан, боруонса мэтээли иилинэр.

Бу Саха сирин хамаандатыгар иккис мэтээл. Күн иннинэ Виктор Рассадин үрүҥ көмүһү ылбыта.

Түмүктүүр күҥҥэ Саха сириттэн Алексей Иванов, Константин Власов, Ларион Андреев, Серафим Яковлев (65 кг диэри), Дьулустаан Сивцев (74 кг диэри) уонна Евгений Коломиец (97 кг диэри) тустуохтара. Киирсиилэр бэс ыйын 14 күнүгэр олохтоох бириэмэнэн 16:00 чааска буолуоҕа.

Следите за самым важным и интересным в Telegram-канале и WhatsApp-группе ЯСИА