Сарсын, ахсынньы 25 күнүгэр, үс төгүллээх олимпийскай чөмпүйүөн, ГосДуума дьокутаата, Арассыыйа Дьоруойа Александр Александрович Карелин Дьокуускайга кэлиэҕэ.
Александр Карелин манна Р.М. Дмитриев аатынан Олимпийскай эрэл училищетыгар гректии-римнии тустууга саала үөрүүлээх арыллыытыгар кыттыаҕа. Кини Саха сиригэр сырыытын бырагырааматыгар Ил Түмэн бэрэссэдээтэлэ Петр Гоголевтыын көрсүһүү, Е.Ярославскай аатынан мусуойу көрүү, гректии-римнии тустуу сайдыытын кэпсэтэр «төгүрүк остуолга» кыттыы, маастар-кылааһы ыытыы баар.
Маастар-кылаас сарсын киэһэ 17.00 чаастан «Триумф» спорт киинигэр буолуоҕа. Манна Карелины кытта Европа уонна аан дойду икки төгүллээх чемпиона Александр Игнатенко уонна аан дойду чемпиона Рустам Аджи кыттыахтара.
