Саха сиригэр самаан сайын кэлбитинэн дьон бэйэ-бэйэлэрин кытта эҕэрдэлэстэ. Сандалы тула олорон саламааттаах алаадьы сиэтилэр, кус миинэ истилэр.
Үөһээ Бүлүү Ороһутун олохтооҕо Анна Иванова социальнай ситимнэргэ тиэргэн иһин тыынар тыыннааҕа барыта сайыҥҥа үөрбүтүн кэпсээтэ.
«Сылаас салгын мааныта сатыылаата үөһэттэн, ыттыын-кустуун, киһилиин-сүөһүлүүн үтүө күммүт үлбүрүйэр күүһүгэр үҥэр-сүктэр кэмнэрбит тиийэн-тиллэн кэллилэр диэн, ырыа мааны дорҕоонун, тойук добун толоруутун, оһуор-мандар оһуохайын тэниттэхпит буолуохтун!
Айыыларга махтал! Өссө биир кыстыгы этэҥҥэ туораабыппытынан барыгытар итии-истиҥ эҕэрдэ!
Көрүҥ, сэргээҥ, оҕо сааскыт дыргыл сытын, сылаас тыынын бу хаартыскалар видео нөҥүө иҥэриниҥ.
Көрөҕүт дуо, бэл, ыппыт Моойторук, мутукча дыргыл сытыгар, чыычаах чоочугурас ырыатыгар астына-дуоһуйа, сылаанньыйа, хаһаайкатын таһыгар дьоһун турук бэйэлээх, имэрийиэ ини диэн баҕатын, хараҕынан эрэ биллэрэн, оргууй сэмээр кэтэһэн бигии сытарын кини», — диэн кини суруйда.
