Саха сиригэр биир күнэ дьылы аһатар сайыммытыгар от үлэтэ саҕаланна. Ол курдук, чурапчылар нэдиэлэ саҥата биир бастакынан окко киирдилэр.
Чурапчыга 34 тыһ. 500 тоннаны оттуур былааны ылыннылар. Олохтоохтор этэллэринэн, от ыйыгар, атырдьах ыйын саҥатыгар охсуулаахтык үлэлээтээхэ, былаан туолуон сөп. Бастакынан оту кэбиспит нэһилиэги дьаһалта биһириэҕэ.
От үлэтин тиэхиньикэтин өрөмүөннээһин, саппаас чааһы атыылаһыы, уматыгы тиэйии үлэтэ тилэри тэриллибит.
Томполор быйылгы былааннара 6 тыһ. 979 тонна. Хаһаайыстыбалар бу күннэргэ тиэхиньикэлэрин көрүнэллэр. Мэҥэ Алдан «Чэчир» хаһаайыстыбатын салайар Егор Сыромятников өрөспүүбүлүкэ граныгар тиксибитэ. Бу үбүгэр-харчытыгар оту пресстиир, охсор уонна хомуйар тиэхиньикэлэри атыыласпыт. Быйыл Байаҕантай нэһилиэгин «Бигэ» уонна «Кэнчээри» хаһаайыстыбалара эмиэ маннык тиэхиньикэни атыыласпыттар. Улуус баһылыга Георгий Герасимов от үлэтигэр анаан 800 тыһ. солк. биэрдэ.
Саха сирэ байылгы былаана уопсайа 493 689 тонна. Ону таһынан 13 810 тонна сиилэһи уонна 14 910 тонна сенаһы бэлэмниир сорук турар.
