Бэс ыйын 3 күнүгэр сарсыарда эрдэ Саха сиригэр, Өлүөнэ өрүс сүнньүгэр, Өлүөнэ муостатын бастакы коффердамын киллэрдилэр. Бу – муоста тутуллуутун биир сүрүн түһүмэҕэ. Историческай дьаһалга 120 киһи кытынна. ЯСИА кэрэспэдьиэннэрэ тутуу былаһааккатыгар сырыттылар.
10 №-дээх тирэххэ анаммыт коффердамы үс буксир көмөтүнэн аҕаллылар: иккитэ быанан соһор, биирэ кэнниттэн анньан биэрэр. Кинилэр уопсай күүстэрэ 4800 ат күүһүгэр тэҥнэһэр.
«Бу конструкция ыйааһына икки тыһыынча туоннаттан тахса уонна үрдүгүнэн биэс мэндиэмэннээх дьиэҕэ холоонноох. Кинини арҕаа траекториянан утары кытыл диэки 2300 миэтэрэ усталаах сиргэ илдьэн якордарынан хамсаабат гына баайдылар. Бу түһүмэххэ коффердам өр кэмҥэ турар, ол кэмҥэ түгэҕи дириҥэтэр үлэлэр ыытыллыахтара. Салгыы бу конструкцияны бырайыагынан көрүллүбүт сиргэ, уҥа кытылтан 300-чэкэ миэтэрэ тэйиччи, аҕалан пилон тирэҕин акылаатын оҥорууга ылсыахтара», — диэн «ВИС» бөлөх корпоративнай коммуникацияларга департаменын салайааччыта Сергей Козловскай кэпсээтэ.
Билигин үс коффердамтан иккитин таҥыыта бүтэн турар. Хас биирдии тутуу үрдүгэ 17-тэн тахса миэтэрэ. Устар коффердамнар Арассыыйаҕа муоста тутуутугар аан бастаан туһаныллаллар. Бу ыстаал тутуулар өрүс сүнньүгэр үлэлиир зоналары кураанах оҥороллор. Маннык технологияны талбыт төрүөттэрэ – Саха сиригэр тутуу сезона кылгаһа. Коффердамнар күүстээх сүүрүктээх, халааннаах уонна уу таһыма уларыйар кэмигэр да үлэлиир кыаҕы биэрэллэр.
«Хаҥас кытылга барыта түөрт тирэх баар буолуоҕа, онтон үһүгэр сыбаайалар акылааттара номнуо бэлэмнэр, бэйэтин эттигин туруорар эрэ хаалла. Уҥа кытылга массыына суолун кутуута салҕаныаҕа. Билиҥҥи туругунан, 3000-тан тахса кубометр буору куппуттар. Ону сэргэ, уҥа кытылга тирэхтэр акылааттарын оҥоруу салҕанар. Коффердам өрүс сүнньүгэр киллэриллэн, бырайыактаах сиригэр чиҥник турдаҕына, скважиналары үүттээһин уонна саҥа акылааты оҥоруу үлэлэрэ саҕаланыахтара», — диэн Сергей Козловскай эбэн эттэ.
Санатан эттэххэ, Өлүөнэ муостата – Арассыыйа Бэрэсидьиэнэ Владимир Путин көҕүлээбит «Олох инфраструктурата» национальнай бырайыак биир сүрүн эбийиэгэ. Муоста тутуута – Саха Өрөспүүбүлүкэтин бырабыыталыстыбата уонна «ВИС» бөлөх концессионнай сөбүлэҥнэрэ. Кини ирбэт тоҥ усулуобуйатыгар уонна экстремальнай килиимэккэ маннык улахан иэннээх вантовай муоста аан дойдуга бастакынан буолуоҕа.
