Кулун тутар 25 күнүн туругунан, Саха сиригэр коронавируһунан ыалдьыбыт дьон ахсаана 10 киһиэхэ тэҥнэстэ. Бу туһунан Ил Дархан Айсен Николаев өрөспүүбүлүкэҕэ коронавирустан олохтоммут усулуобуйа туругун боппуруостарынан суруналыыстары кытта күннэтэ ыытыллар көрсүһүү кэмигэр иһитиннэрдэ.
«Ааспыт бээтинсэҕэ Новосибирсайга туоһулааһыҥҥа ыытыллыбыт анаалыстар түмүктэрэ чопчуланна. Өрөспүүбүлүкэҕэ коронавируһунан ыалдьыбыт дьон ахсаана 10 киһиэхэ тэҥнэстэ», — диэн эттэ.
Коронавируһунан ыалдьыбыттара чопчу бигэргэммит дьон истэригэр биир Америкаттан кэлбит кыыс, биир ЯТЭК хампаанньа үлэһитэ уонна биир ЯТЭК хампаанньа салайааччытын кытта алтыспыт урбаанньыт бааллара бэлиэтэнэр.
«Бу дьону кытта алтыспыт дьон бары быһаарылыннылар. Барыларын анаалыстарыгар билиҥҥи туругунан COVID-19 вируһа баара көстүбэтэ. Анаалыстара Новосибирскайга туоһулааһыҥҥа ыытылыннылар», — диэн Ил Дархан эбэн эттэ.
