Ыам ыйын 20 күнүн туругунан, Саха сиригэр клещтэн 33 ытыртарыы бэлиэтэннэ. Кинилэртэн 11-рэ Арассыыйа атын эрэгийиэннэриттэн кэлбит дьон. Бу туһунан Роспотребнадзор Саха сиринээҕи салаата иһитиннэрэр.
Түбэлтэлэр улуустарынан тарҕаныылара:
— Ленскэй — 12 түбэлтэ;
— Алдан — 6 түбэлтэ;
— Нерюнгри — 3 түбэлтэ;
— Өлүөхүмэ уонна Дьокуускай — 4-түү түбэлтэ;
— Мэҥэ Хаҥалас, Сунтаар, Уус Маайа уонна Чурапчы — 1-дии түбэлтэ.
33 эмсэҕэлээбиттэртэн 18 киһи клещ энцефалитын утары серопрофилактика ылбыт. Икки киһи эрдэ клещ энцефалитыгар утары быһыы ылбыт. Билиҥҥи туругунан, барыта 8209 киһи, ол иһигэр 1278 оҕо, быһыыны ылбыт.
Саха сиригэр сыл аайы клещ энцефалита бэлиэтэнэр. 2023 сылтан бу ыарыыга эндемичнэй улуустар ахсааннарыгар Алдан, Ленскэй, Нерюнгри, Өлүөхүмэ, Сунтаар уонна Хаҥалас улуустара киирэллэр.
