Саха сирэ — дойдуга санкция тыҥааһынын кэмигэр бастакынан оҕолоох дьиэ кэргэттэри өйүүр миэрэлэри ылбыт регионунан буолар. Бастатан туран көмүскэлэ суох категорияларга, диэтэ «Берегиня» тулаайах уонна көрүүтэ-истиитэ суох хаалбыт оҕолор кииннэрин дириэктэрэ Лена Ефремова, суруйар СИА.
Өрөспүүбүлүкэ Уопсастыбаннай палаататын социальнай бэлиитикэҕэ хамыыһыйатын бэрэссэдээтэлин, социальнай тэрилтэ дириэктэрин быһыытынан Лена Ефремова бырабыыталыстыба социальнай эйгэҕэ ыытар миэрэлэрин «үчүгэйинэн» сыналаата.
«Биһиги дойдубут, санкциялар киирэн, хааччахтааһыннары көрсүбүт кэмигэр, Саха сирин былааһа дойдуга бастакынан оҕолоох ыаллары өйүүр миэрэлэри киллэрдэ. Сүрүннээн, көмүскэлэ суох категорияларга ананар. Өссө бу событиелар буола иликтэринэ, биһиги баһылыкпыт Айсен Сергеевич Николаев Саха сиригэр Ийэ сылын биллэрбитэ. Манна улахан өйөбүлүнэн сыаллаах хапытаал «Үйэ оҕолоро» буолбута. Саха сирэ төрөөһүн көрдөрүүтүнэн Уһук Илиҥҥэ бастакы миэстэни, дойдуга сэттис миэстэни ылара олус үөрүүлээх. Мин, тулаайах оҕолорго анаммыт социальнай тэрилтэ салайааччытын быһыытынан, ылыллар миэрэлэри сөптөөҕүнэн ааҕабын», — диэтэ Ефремова.
