Саха Өрөспүүбүлүкэтин Ил Дархана Айсен Николаев «Якутия, вперёд!» биэриигэ от ыйын 2 күнүгэр былырыын кини көҕүлээһининэн саҕаламмыт тыа хаһаайыстыбатын реформатын орто түмүктэрин таһаарда уонна Амма улууһугар саҥа үүт сыаҕа аһыллыытын туһунан кэпсээтэ.
«Түмүктэр бэйэлэрэ кэпсииллэр. Ааспыт сылга биһиги, биэс сыл устата аан бастаан, үүт ыамын улаатыннардыбыт. Бурдук үүннэриитигэр, хас да уонунан сылларга буолбатах, рекорднай көрдөрүүлэннибит, оҕуруот аһыгар былааммытын барытын толордубут», — диэтэ Николаев.
Кини этэринэн, өрөспүүбүлүкэҕэ тыа хаһаайыстыбатын кыра кыамталаах эбийиэктэрин тутуу көхтөөхтүк барар. Быйыл 109 эбийиэги тутуу былааннанар, онтон 40-тан тахсата номнуо үлэҕэ киирбит, өссө 60-ча эбийиэк тутулла турар. Үбүлээһиҥҥэ сыһыаннаах боппуруостар бааллара биллэр, ол эрээри, Ил Дархан бэлиэтииринэн, бырабыыталыстыба бу сыл бүтүөр диэри аграрийдарга өйөбүлү оҥорорго быһаарыылары тобулуо.
Кини Амма улууһун Абаҕа сэлиэнньэтигэр үүтү оҥорон таһаарар сыах аһыллыытыгар тохтоото. Тэрилтэ күн ахсын үс туоннаҕа тиийэ үүтү астыыр, аһытыллыбыт үүт бородууксуйатын уонна арыыны оҥорон таһаарар. Бородууксуйа ирдэниллэр бэрэбиэркэлэри уонна тургутуулары ааһар. Ол кэнниттэн Амма улууһун социальнай тэрилтэлэригэр тиэйиини саҕалыыр былааннаахтар.
Ил Дархан этэринэн, салааҕа тыа хаһаайыстыбатын оҥорон таһаарааччыларын бэйэлэрин сыһыаннара эмиэ уларыйар: хаһаайыстыбалар оҥорон таһаарыынан эрэ муҥурдаммакка, экономическай көдьүүстэрин үрдэтиигэ, сүөһү ахсаанын элбэтиигэ уонна дохуоттаах буолууга болҕомтолорун уураллар.
Биэриигэ уматыгынан хааччыйыы боппуруоһа эмиэ таарылынна. Айсен Николаев иһитиннэрбитинэн, аграрийдарга урут үөскээн сылдьыбыт ыарахаттар быһаарыллыбыттар, онон оттооһун уонна хомуур хампаанньатын кэмигэр уматык урукку бэрээдэгинэн бэриллиэ. «Баар ыарахаттары да үрдүнэн, биһиги аграрийдарбытыгар көмөлөһүөхтээхпит», — диэн тоһоҕолоон бэлиэтээтэ Николаев.
Өйөбүл бырагыраамата Арассыыйа Федерациятын Бэрэсидьиэнэ Владимир Путин 2030 сылга, 2021 сылы кытта тэҥнээтэххэ, АПК бородууксуйатын оҥорон таһаарыытын 25% кырата суох улаатыннарар соругун толорорго, ону тэҥэ Айсен Николаев тыа хаһаайыстыбатын олохтоох оҥорон таһаарыыны сайыннарыыга стратегическай ыйааҕын олоххо киллэриигэ туһуланар.
