Кыайыы Күнүн иннинэ Саха сирин баһылыга Айсен Николаев биир кэмнээх төлөбүр туһунан ыйаахха илии баттаата. Аҕа дойду улуу сэриитин сэттэ кыттыылааҕа биирдии мөлүйүөн солкуобайы ыллылар.
«Бу быһаарыынан ыарахан тургутууну ааспыт, дойдубут көҥүлүн көмүскээбит, инникини бэлэхтээбит кыайыылаахтар көлүөнэлэригэр дириҥ ытыктабылы, истиҥ махталы биллэрэбит. Бэтэрээннэр аттыларыгар сылдьыахтаахпыт, болҕомтолоохтук, кыһамньылаахтык тулалыахтаахпыт, махталбытын тылынан эрэ буолбакка, чопчу дьыалаларынан бигэргэтиэхтээхпит», — диэн Айсен Николаев бэлиэтээтэ.
2025 сыллаахха Саха сиригэр бэтэрээннэри өйөөһүн эбиллибитэ. Ол курдук, Кыайыы 80 сылын туолуутугар сэрии кыттыылаахтара икки мөлүйүөн солкуобайы ылбыттара; блокадалаах Ленинград олохтоохторо, урукку концлааҕырдар уонна геттолар сокуоннай саастарын ситэ илик хаайыылаахтара, сэрии кыттыылаахтарын огдооболоро — 80 тыһыынча солкуобайы; тыыл үлэһиттэрэ — 50 тыһыынча солкуобайы ылбыттара.
Өрөспүүбүлүкэҕэ барыта 11 871 бэтэрээн уонна тыыл үлэһитэ, сэрии оҕолорун киллэрэн туран, баар. Саха сирин былааһа бэтэрээннэр тустарыгар кыһамньы — тылынан буолбакка, дьиҥнээх дьыаланан бигэргэтиллибит приоритет буоларын тоһоҕолоон бэлиэтиир. Бэтэрээннэргэ көмө -материальнай өйөбүл эрэ буолбакка, эйэни көмүскээбит дьоҥҥо дириҥ ытыктабыл бэлиэтэ.
Санатан эттэххэ, быйыл «Өлбөт үөстээх полк» акция үгэскэ кубулуйбут киэбинэныытыллыаҕа. Кыайыы Күнүн чиэһигэр «Георгиевская лента», «Диктант Победы», «Поем двором», «Свеча памяти», «Окна Победы» акциялар уонна да атын тэрээһиннэр ыытыллыахтара.
