Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччы Дмитрий Садовников олох-дьаһах хомунаалынай хаһаайыстыба эбийиэктэрин, уматык-энергетика комплексын тэрилтэлэрин, дьиэ-уот пуондатын уонна социальнай эйгэ эбийиэктэрин 2026–2027 сыллардааҕы оттук сезонугар бэлэмнэниигэ анаммыт сүбэ мунньаҕы ыытта.
Кэлэр оттук сезонугар өрөспүүбүлүкэҕэ 1 154 хочуолунайы, 4 163 км сылааһынан хааччыйар ситими, 1 763 км уу ситимин, 748 км канализация ситимин, араас кылаастаах күүрүүлээх 853 км уот лииньийэлэрин уонна 116 дизельнэй электроыстаансыйаны бэлэмниир наада. Бүгүҥҥү күҥҥэ тэрилтэлэр өрөмүөн бырагыраамаларын толоруулара 55% буолар.
Сүбэ мунньахха Арассыыйа Энергетикэтин министиэристибэтин 2024 сыл сэтинньи 29 күнүнээҕи 2234 №-дээх бирикээһинэн бигэргэтиллибит оттук сезонугар бэлэми сыаналыыр саҥа ирдэбиллэри толорууга ураты болҕомто уурулунна. Билигин олохтоох салайыныы уорганнара уонна Ростехнадзор Ленскэйдээҕи управлениета саахал туһунан былааннары, оттук сезонугар бэлэмнэнии былааннарын, сылааһынан хааччыйыы схемаларын чуолкайдааһыны, саахалы утары үөрэтиилэри тэрийиини уонна бэлэм пааспардарын ыларга наадалаах атын булгуччулаах миэрэлэри толорууга бииргэ үлэлииллэр.
Дмитрий Садовников оттук сезонугар бэлэмнэнии өрөспүүбүлүкэ бырабыыталыстыбатын мэлдьи хонтуруолугар баарын бэлиэтээтэ. Кыраапыктан хаалбыт муниципальнай тэриллиилэргэ уонна тэрилтэлэргэ ураты болҕомто ууруллар, кинилэргэ үлэни түргэтэтэргэ наадалаах миэрэлэр ылыллаллар.
Туспа боппуруоһунан 2026 сыл навигациятыгар уматык-энергетикэ ресурсаларын тиэйии хаамыыта көрүлүннэ. ОДьКХ уонна энергетикэ эбийиэктэригэр наадыйыыга тириэрдии былааннаах кээмэйэ 523,611 тыһ. туонна. От ыйын ортотун туругунан 166 457 туонна, ол эбэтэр былаантан 32%, тириэрдилиннэ, 87 963 туонна кэллэ, бу 16%-ҥа тэҥнэһэр.
Сүбэ мунньах түмүктэрин таһаарарыгар, Дмитрий Садовников оттук сезонугар бэлэмнэнии дьаһалларын холбоһуктаах былаанын булгуччу толорорго, өрөмүөн үлэлэрин уонна уматык-энергетическэй ресурсалары аҕалыы кыраапыгын тутуһууну хонтуруоллууру күүһүрдэргэ, ону тэҥэ муниципальнай тэриллиилэр бэлэм пааспардарын ыларга наадалаах бары миэрэлэри кэмигэр бүтэрэргэ сорудахтаата.
